وزیر خارجہ اسحاق ڈار کا سلامتی کونسل کی صدارت سنبھالنے کی اعلیٰ سطحی دستخطی تقریبات میں شرکت کیلئے آئندہ ہفتہ امر یکہ جائیں گے

اسلام آباد (اُردو پوائنٹ اخبارتازہ ترین - این این آئی۔ 19 جولائی2025ء)نائب وزیراعظم وو زیر خارجہ سینیٹر محمد اسحاق ڈار نیویارک میں پاکستان کی اقوام متحدہ کی سلامتی کونسل (یو این ایس سی) کی صدارت سنبھالنے کے اعلیٰ سطحی پروگراموں میں شرکت کے ساتھ ساتھ دیگر مصروفیات کے لیے ائندہ ہفتے امریکہ کا دورہ کریں گے۔ترجمان دفتر خارجہ کے مطابق اپنے دورہ کے دوران نیویارک میں، پاکستان کی سلامتی کونسل کی صدارت سنبھالنے کے حوالہ سے دستخط کرنے کی تقریب میں شرکت کے ساتھ ایک اعلیٰ سطحی مباحثے کی صدارت کریں گے جس میں ’’کثیر الجہتی کے ذریعے بین الاقوامی امن اور سلامتی کو فروغ دینا اور تنازعات کے پرامن تصفیہ‘‘ پر گفتگو کی جائے گی۔

اعلیٰ سطحی مباحثے کا مقصد کثیرالجہتی کے استحکام کے طریقے تلاش کرنا اور تنازعات کے پرامن حل کے لیے سفارت کاری اور ثالثی کو بڑھانا ہے۔

(جاری ہے)

مزید براں نائب وزیراعظم وو زیر خارجہ سینیٹر محمد اسحاق ڈار ’’مشرق وسطیٰ کی صورت حال ، فلسطین کا سوال‘‘کے موضوع پر سلامتی کونسل کے سہ ماہی مباحثے کی صدارت کریں گے۔سینیٹر محمد اسحاق ڈار اقوام متحدہ کی سلامتی کونسل کی ایک اعلیٰ سطحی بریفنگ کی بھی صدارت کریں گے جس میں اقوام متحدہ اور اسلامی تعاون تنظیم (او ائی سی )کے درمیان تعاون بڑھانے پر توجہ مرکوز کی جائے گی۔

یہ اجلاس بین الاقوامی امن اور سلامتی کے قیام کے لیے او آئی سی اور اقوام متحدہ کے درمیان تعاون کو مضبوط بنانے کے لیے پاکستان کی کوششوں کے ایک حصے کے طور پر منعقد کیا جا رہا ہے۔دفتر خارجہ کے مطابق فلسطینی عوام کے حق خود ارادیت کے لیے پاکستان کے مضبوط عزم اور غیر متزلزل حمایت کے اظہار کے لیے نائب وزیر اعظم و وزیر خارج’’مسئلہ فلسطین کے سوال کے پرامن حل اور دو ریاستی حل کے نفاذ‘‘ کے موضوع پر اعلیٰ سطحی کانفرنس میں بھی شرکت کریں گے۔

نیویارک میں اپنے قیام کے دوران محمد اسحاق ڈار کی اپنے ہم منصبوں کے ساتھ ساتھ اقوام متحدہ کے سینئر حکام کے ساتھ بھی متعدد ملاقاتیں بھی متوقع ہیں۔نائب وزیراعظم/وزیر خارجہ سینیٹر محمد اسحاق ڈار کا نیویارک اور واشنگٹن کا دورہ کثیرجہتی کے لئے پاکستان کے بڑھتے ہوئے کردار اور اہمیت کے ساتھ ساتھ امریکہ کے ساتھ بڑھتے ہوئے کثیر الجہتی تعلقات کی مثال ہے۔ مزید براں اقوام متحدہ کی سلامتی کونسل کے مشرق وسطیٰ پر سہ ماہی مباحثے کے ساتھ ساتھ ’’مسئلہ فلسطین کے سوال کا پرامن اور دو ریاستی حل کے نفاذ‘‘ کے موضوع پر بین الاقوامی کانفرنس میں پاکستان کی اعلیٰ سطحی شرکت بھی فلسطینی کاز کے لیے پاکستان کے غیر متزلزل عزم اور حمایت کا منہ بولتا ثبوت ہے۔