اپوزیشن ایسا پروپیگنڈا کر رہی ہے جیسے انہوں نے ٹکٹس کسی غریب ورکرز کو دیے ہوں

پشاور ( اُردو پوائنٹ اخبارتازہ ترین۔ 21 جولائی 2025ء ) مشیر اطلاعات خیبرپختونخواہ بیرسٹر ڈاکٹر سیف نے کہا ہے کہ اپوزیشن ایسا پروپیگنڈا کر رہی ہے جیسے انہوں نے ٹکٹس کسی غریب ورکرز کو دیے ہوں، پی ٹی آئی نے مراد سعید، فیصل جاوید، پیر نورالحق قادری اور روبینہ ناز جیسے امیدواروں کو ٹکٹس دیے، یہ سرمایہ دار نہیں ہیں۔ انہوں نے اپوزیشن کے بیانات پر اپنے ردعمل میں کہا کہ اپوزیشن ایسا پروپیگنڈا کر رہی ہے جیسے انہوں نے خود اپنے ٹکٹس کسی غریب ورکر کو دیے ہوں۔

پی ٹی آئی نے مراد سعید، فیصل جاوید, پیر نورالحق قادری اور روبینہ ناز جیسے امیدواروں کو ٹکٹس دیے ہیں، جو سرمایہ دار نہیں ہیں۔ اپوزیشن وضاحت کرے کہ کتنے عام ورکر اور کتنے سرمایہ داروں کو ٹکٹ دیے ہیں؟، اپوزیشن پروپیگنڈا کرنے کے بجائے مخصوص نشستوں پر قبضے کا جواب دے۔

(جاری ہے)

صوبے کا مسترد شدہ ٹولہ پی ٹی آئی کی مخصوص نشستوں پر حلف اٹھا کر اخلاقیات کا بھاشن نہ دے، پہلے فارم 47 کے ذریعے پی ٹی آئی کے مینڈیٹ پر ڈاکا ڈالا گیا،اب مخصوص نشستوں پر قبضہ کر کے عوام کو گمراہ کیا جا رہا ہے۔

دوسری جانب سینیٹ الیکشن میں پاکستان تحریک انصاف کے ناراض امیدوار خرم ذیشان کا کہنا ہے کہ میرا مقصد سینیٹر بننا نہیں بلکہ اشرافیہ کا تکبر پاش پاش کرنا تھا۔ اپنے ایک بیان میں انہوں نے کہا کہ اشرافیہ بند کمروں میں بندر بانٹ کرتے ہیں اور بلامقابلہ آ جاتے ہیں، اگر ہار جیت کی بات ہے تو میں جیت چکا ہوں، اس سے زیادہ اہم وجہ بانی پی ٹی آئی عمران خان کے دشمنوں سے ہاتھ ملانے سے انکار تھا، جب الیکشن ہوگا تو اس میں نتیجہ جو بھی ہو جیت نظریے کی ہے، میں نے عمران خان سے سیکھا ہے کہ آزمائش کے وقت انسان کا اصل کردار سامنے آتا ہے، اپنے اعصاب کو فولاد کردیں تو آپ کو ہر دباؤ پر صرف ہنسی ہی آئے گی۔

دوسری طرف صوبہ خیبرپختونخواہ میں سینیٹ انتخابات میں حصہ لینے والے تحریک انصاف کے 4 ناراض امیدوار اچانک انتخابی دوڑ سے دستبردار ہوگئے، جن میں عائشہ بانو، وقاص اورکزئی، ارشاد حسین اور عرفان سلیم شامل ہیں جب کہ پانچویں ناراض امیدوار خرم ذیشان اب بھی انتخابی دوڑ میں شامل ہیں، اس پیشرفت کے بعد تمام امیدواروں کے بلا مقابلہ منتخب ہونے کا امکان بڑھ چکا ہے۔

قبل ازیں وزیراعلیٰ خیبرپختونخواہ علی مین گنڈاپور کا کہنا تھا کہ سینیٹ الیکشن کے ناراض امیدواروں کیخلاف پارٹی کارروائی کرے گی، اپوزیشن اور حکومت کے درمیان دھوکا دہی نہیں ہوگی، ہارس ٹریڈنگ کو ڈونکی ٹریڈنگ کہتا ہوں، گھوڑا ایک بڑا قابل عزت جانور ہے میں خود گھوڑوں کا بہت شوقین ہوں، دیکھا جائے تو گدھا بھی خدمت کرنے والا جانور ہے، سینیٹ میں خرید و فروخت اس سے بھی گھٹیا کام ہے، فیصلہ کیا ہے کہ سینٹ میں خرید و فروخت نہیں ہونی چاہیئے۔

انہوں نے کہا کہ صوبے کی تاریخ میں پہلی بار اتنا اچھا فیصلہ ہورہا ہے، اس سے پہلے پنجاب سینیٹ انتخابات میں ہم نے یہی کیا ہے، بانی پی ٹی آئی نے جو فیصلہ کیا تھا اسی فارمولے پرعمل کریں گے، عدالتی احکامات کے تحت اب مخصوص نشستوں کے منتخب اراکین گورنر ہاؤس میں حلف لے رہے ہیں، ناراض امیدواروں کے خلاف پارٹی کارروائی کرے گی، عمران خان کے فیصلے کی نفی بانی پی ٹی آئی کی نفی ہے۔