Live Updates

چیئرمین سینیٹ کا بارشوں اور سیلاب کے نتیجے میں قیمتی انسانی جانوں کے ضیاع اور مالی نقصان پر افسوس کا اظہار، متاثرہ علاقوں میں ریسکیو و ریلیف کے موثر اقدامات کی ہدات

منگل 22 جولائی 2025 16:52

اسلام آباد (اُردو پوائنٹ اخبارتازہ ترین - اے پی پی۔ 22 جولائی2025ء) چیئرمین سینیٹ سید یوسف رضا گیلانی نے ملک کے مختلف علاقوں بالخصوص بابوسر ٹاپ، مظفرآباد، لوئر دیر، سوات اور دیگر اضلاع میں شدید بارشوں، کلاؤڈ برسٹ اور سیلاب کے نتیجے میں قیمتی انسانی جانوں کے ضیاع اور مالی نقصان پر گہرے دکھ اور افسوس کا اظہار کیا ہے۔منگل کو سینٹ سیکرٹریٹ سے جاری بیان کے مطابق چیئرمین سینیٹ نے کہا کہ متاثرہ خاندانوں کے غم میں پوری قوم برابر کی شریک ہے، اور اس کٹھن وقت میں ہم سب کو یکجہتی، ہمدردی اور فوری عملی اقدامات کی ضرورت ہے۔

انہوں نے متاثرہ خاندانوں سے دلی ہمدردی کا اظہار کرتے ہوئے جاں بحق افراد کے درجات کی بلندی اور زخمیوں کی جلد صحت یابی کے لیے دعا کی۔انہوں نے حکومتِ پاکستان، این ڈی ایم اے، صوبائی حکومتوں اور دیگر متعلقہ اداروں سے کہا ہے کہ وہ فوری طور پر متاثرہ علاقوں میں ریسکیو اور ریلیف کے مؤثر اقدامات کریں، خاص طور پر ان علاقوں میں جہاں کلاؤڈ برسٹ یا لینڈ سلائیڈنگ جیسی ہنگامی صورتحال پیش آئی ہے۔

(جاری ہے)

انہوں نے کہا کہ زخمیوں کو فوری طبی امداد، بے گھر افراد کو شیلٹر، خوراک اور ضروریاتِ زندگی کی فراہمی کو یقینی بنایا جائے۔سید یوسف رضا گیلانی نے کہا کہ ماحولیاتی تبدیلیوں کے اثرات پاکستان جیسے ممالک پر شدید انداز میں ظاہر ہو رہے ہیں، اور حالیہ بارشیں اور کلاؤڈ برسٹ جیسے واقعات اسی کی کڑی ہیں۔ انہوں نے قدرتی آفات سے نمٹنے کے قومی نظام کو ازسرِ نو فعال، مربوط اور جدید خطوط پر استوار کرنے پر زور دیا تاکہ مستقبل میں ایسے سانحات سے بہتر طور پر نمٹا جا سکے۔ چیئرمین سینیٹ نے کہا کہ ایوان بالا ہر مشکل وقت میں عوام کے ساتھ کھڑی رہی ہے اور موجودہ حالات میں بھی ہم اپنے تمام وسائل اور اثر و رسوخ بروئے کار لا کر متاثرہ افراد کے مسائل کے حل میں کردار ادا کریں گے۔