سی این ایف کی صورت میں پنجاب کا مستقبل محفوظ نظر آ رہا ہے ،وزیراعلیٰ پنجاب

لاہور (اُردو پوائنٹ اخبارتازہ ترین - اے پی پی۔ 22 جولائی2025ء) وزیراعلیٰ پنجاب مریم نوازشریف نے پولیس ٹریننگ کالج چوہنگ میں پنجاب کائونٹر نارکوٹکس فورس کی کمیشننگ تقریب میں خصوصی شرکت کی اورمنشیات کے خاتمے کیلئے پنجاب کائونٹر نارکوٹکس فورس لانچ کی ۔وزیر اعلیٰ مریم نواز کو سی این ایف نے جنرل سلامی پیش کی۔وزیر اعلیٰ مریم نوازکی موجودگی میں کائونٹر نارکوٹکس فورس کے افسروں اور جوانوں نے حلف اٹھایا۔

مریم نواز شریف نے کائونٹر نارکوٹکس ٹریننگ میں بہترین پرفارمنس پر افسروں اور جوانوں میں انعامات تقسیم کئے، انہوں نے اے این ایف کے پرچم کو پنجاب کاونٹر نارکوٹکس فورس کے سپرد کیا۔وزیراعلیٰ مریم نوازنے کاونٹر نارکوٹکس فورس کے جوانوں سے ملاقات کی۔ انہوں نے آلات، ٹیکنالوجی اور گاڑیوں کامعائنہ کیا اور پنجاب کاونٹر نارکوٹکس فورس کے قیام پر اطمینان کا اظہار کیا۔

(جاری ہے)

وزیر اعلیٰ مریم نواز شریف کو ڈی جی سی این ایف برگیڈیئر مظہر اقبال نے فورس کے بارے میں تفصیلی بریفنگ میں بتایا کہ پنجاب کاونٹر نارکوٹکس فورس کے لیے پہلے فیز میں866 آسامیوں پر بھرتیاں کی گئی ہیں۔ پنجاب کائونٹر نارکوٹکس فورس کو تمام ڈویژن میں فنکشنل کر دیا گیا۔پہلے مرحلے میں پنجاب کی ہر ڈویژن میں سی این ایف کے سٹیشنز اور ریجنل ڈائریکٹوریٹس قائم ہوچکے ہیں۔

دوسرے مرحلے میں سی این ایف کا دائرہ کار ضلعی سطح تک بڑھایا جائے گا۔سی این ایف کے افسران اور جوانوں کو اے این ایف اکیڈمی راولپنڈی میں12 ہفتوں کی پروفیشنل تربیت دی گئی۔بریفنگ میں مزید بتایا گیا کہ کائونٹر نارکوٹکس فورس کو جدید ہتھیار اور آپریشنل گاڑیاں فراہم کی گئی ہیں۔کائونٹر نارکوٹکس فورس کے ڈی جی این سی کے دفتر کیلئے چار منزلہ عمارت فراہم کی گئی۔

پنجاب کائونٹر نارکوٹکس فورس کے قیام کیلئے2.33 ارب روپے مختص کیے گئے۔کائونٹر نارکوٹکس فورس پنجاب کی جیلوں اور تعلیمی اداروں میں منشیات کے خاتمے کیلئے کام کرے گی۔وزیراعلیٰ مریم نواز شریف نے کہا کہ سی این ایف کی صورت میں پنجاب کا مستقبل محفوظ نظر آ رہا ہے۔پنجاب کی تمام ڈویژنز کی سی این ایف فورس کے دستوں نے ترانوں کی گونج میں مارچ پاسٹ کیا۔وزیر اعلیٰ مریم نواز شریف نے سی این ایف لیڈیز سٹاف کا مارچ پاسٹ دیکھ کر مسرت کا اظہار کیا۔ تقریب میں سی این ایف بینڈ نے دل دل پاکستان ملی نغمہ پیش کیا۔وزیر اعلیٰ مریم نواز شریف نے بینڈ کو انعامات سے نوازا۔بعد ازاں وزیر اعلیٰ مریم نواز شریف نے سی این ایف افسروں اور جوانوں کے ساتھ گروپ تصاویر بھی بنوائیں۔