سیکیورٹی فورسز نے قلات میں آپریشن کے دوران فتنہ الہندوستان کے 8 دہشتگرد ہلاک کردیئے

ہلاک دہشتگرد متعدد دہشت گردی کی سرگرمیوں میں ملوث تھے، ہندوستانی اسپانسرڈ دہشتگردوں اور سہولتکاروں کو انصاف کے کٹہرے میں لایا جائے گا۔ آئی ایس پی آر

ثنااللہ ناگرہ منگل 22 جولائی 2025 20:49

راولپنڈی ( اردوپوائنٹ اخبار تازہ ترین۔ آئی پی اے ۔ 22 جولائی 2025ء ) سیکیورٹی فورسز نے قلات میں آپریشن کے دوران فتنہ الہندوستان کے 8 دہشتگرد ہلاک کردیئے ہیں۔ پاک فوج کے شعبہ تعلقات عامہ آئی ایس پی آر کے مطابق سیکیورٹی فورسز نے بلوچستان کے ضلع قلات میں فتنہ الہندوستان کے دہشتگردوں کی موجودگی کی اطلاع پر انٹیلی جنس پر مبنی آپریشن کیے ۔

(جاری ہے)

سیکیورٹی فورسز نے آپریشنز کے دوران فتنہ الہندوستان کے دہشتگردوں کے ٹھکانوں کو کامیابی کے ساتھ نشانہ بنایا۔ آپریشن کے دوران فائرنگ کے تبادلے میں فتنہ الہندوستان کے 8 دہشتگردوں کو جہنم واصل کردیا گیا۔ دہشتگردوں سے اسلحہ، گولہ بارود اور دھماکہ خیز مواد برآمد ہوا، ہلاک دہشتگرد متعدد دہشت گردی کی سرگرمیوں میں ملوث تھے۔ آئی ایس پی آر کا کہنا ہے کہ پاکستان کی سیکیورٹی فورسز ملک سے ہندوستانی اسپانسرڈ دہشت گردی کے ناسور کو ختم کرنے کیلئے پرعزم ہے۔ ہندوستانی اسپانسرڈ دہشت گردوں اور سہولت کاروں کو انصاف کے کٹہرے میں لایا جائے گا۔