پی ٹی آئی پنجاب کے صدر حماد اظہر کا عدالت کے سامنے سرنڈرکرنے کا فیصلہ

لاہور(اردوپوائنٹ اخبار تازہ ترین۔25جولائی 2025)پاکستان تحریک انصاف پنجاب کے صدر حماد اظہر نے عدالت کے سامنے سرنڈرکرنے کا فیصلہ کرلیا، قریبی ساتھیوں سے مشاورت مکمل کرلی حتمی مشاورت کیلئے وکلا کی ٹیم کو بلا لیا، رہنماء پی ٹی آئی  عدالت کے سامنے پیش ہوکر ضمانت کی درخواست دینگے، حماد اظہر نے یہ بھی فیصلہ کیا ہے کہ اگر عدالت سے ضمانت نہ ملی تو وہ جیل جانے کو بھی تیار ہیں۔

حماد اظہر نے ممکنہ گرفتاری کیخلاف عدالت سے رجوع کرنے کا فیصلہ کیا ہے۔ذرائع کا کہنا ہے کہ حماد اظہر نے قانونی ٹیم کو فوری طور پر طلب کیا ہے تاکہ عدالت میں پیشی اور ضمانت کیلئے درکار قانونی لائحہ عمل طے کیا جا سکے۔ پی ٹی آئی رہنما 2 سال روپوش رہنے کے بعد دو روزقبل اپنے والد کی وفات پر سامنے آئے تھے۔

(جاری ہے)

پاکستان تحریک انصاف پنجاب کے صدر حماد اظہر کے خلاف 70سے زائد مقدمات درج ہیں۔

سماجی رابطے کی ویب سائٹ ایکس پر اپنے پیغام میں حماد اظہر نے لکھا کہ اپنی اور اپنے خاندان کی طرف سے ان ہزاروں ساتھیوں کا شکر گزار ہوں جنہوں نے میرے والد کے جنازے میں اور قرآن خوانی میں شرکت کی اور ان لاکھوں افراد کا بھی جنھوں نے افسوس کے پیغامات بھجوائے اور ان کی مغفرت کیلئے دعا کی۔ان کا کہنا تھا کہ تمام سیاسی جماعتوں کے قائدین جنہوں نے ان کی یاد میں بہترین الفاظ کہے میرے والد میاں اظہر مرحوم کیلئے دعا کی ہم ان کے بھی مشکور ہیں۔

رہنما تحریک انصاف کامزید یہ بھی کہنا تھا کہ میرے والد کی میراث شرافت، ایمانداری اور وضع داری ہے جو صرف میرے لئے نہیں بلکہ پورے پاکستان کے سیاسی کلچر کیلئے ایک اثاثہ اور شاندار روایت ہے، اپنے والدین کا اکلوتا بیٹا، تین بہنوں کا بھائی اور دو کم سن بچوں کا باپ ہوں، مجھ سے زیادہ تکلیف اور دکھ میرے گھر والوں نے دو سال سے زائد عرصہ تک برداشت کی۔

حماد اظہر نے اپنی پوسٹ میں یہ بھی کہا کہ ظاہر ہے کہ میں اس دکھ کی گھڑی میں اپنے گھر والوں خصوصی طور پر اپنی والدہ کے ساتھ اب موجود رہنے کی خواہش رکھتا ہوں۔ میں بے گناہ ہوں اور جعلی پرچوں کا نشانہ ہوں جن کا کوئی سر پیر نہیں۔ اس سلسلے میں عدالت سے رجوع کروں گا اور انصاف طلب کروں گا، مل گیا تو اللہ کا شکر ادا کروں گا اور نا ملا تو استقامت اور صبر سے مزید جبر برداشت کروں گا۔

بے شک اللہ صابرین کا ساتھ دینے والا ہے۔یاد رہے کہ اس سے قبل پی ٹی آئی رہنماء حماد اظہر تقریباً دو سال سے روپوش تھے اور 9 مئی کے واقعات کے بعد سے مختلف مقدمات میں پولیس کو مطلوب تھے وہ حال ہی میں اپنے والد اور سابق گورنر پنجاب میاں محمد اظہر کے انتقال پر منظر عام پر آئے اور نماز جنازہ میں شرکت کیلئے اپنی رہائش گاہ پر پہنچے تھے۔9 مئی 2023 کو عمران خان کی گرفتاری کے بعد ہونے والے پرتشدد مظاہروں اور عسکری املاک پر حملوں کے نتیجے میں پی ٹی آئی کے کئی رہنما روپوش ہو گئے جن میں حماد اظہر بھی شامل تھے۔

ان کے خلاف نقص امن سمیت مختلف مقدمات درج تھے۔حماد ا ظہر پاکستان کے سینئرسیاستدان میاں اظہر کے صاحبزادے ہیں جو سابق گورنر پنجاب رہ چکے تھے۔ حماد اظہر نے 2011میں تحریک انصاف میں شمولیت اختیار کی تھی وہ2018 کے عام انتخابات میں لاہور کے حلقہ این اے-126 سے قومی اسمبلی کے رکن منتخب ہوئے اور عمران خان کی کابینہ میں  2018 سے 2022 تک متعدد وزارتی عہدوں پر فائز رہے تھے جن میں وزیر توانائی اور وزیر خزانہ کے عہدے شامل تھے۔