کیپٹن محمد سرور شہید،نشان حیدر کی 77 ویں برسی عقیدت و احترام سے ساتھ منائی جا رہی ہے،آئی ایس پی آر

اتوار 27 جولائی 2025 01:20

راولپنڈی (اُردو پوائنٹ اخبارتازہ ترین - اے پی پی۔ 27 جولائی2025ء) پاکستان کی مسلح افواج کیپٹن محمد سرور شہید،نشان حیدر کی 77 ویں برسی کو عقیدت و احترام سے ساتھ منا رہی ہیں ۔پاک فوج کے شعبہ تعلقات عامہ (آئی ایس پی آر)کے مطابق نشان حیدر کے پہلے وصول کنندہ کے طور پر کیپٹن محمد سرور شہید نے 27 جولائی 1948 کو پہلی کشمیر جنگ کے دوران تلپترا (آزاد کشمیر) میں اپنی جان کا نذرانہ پیش کیا ،انہوں نے اپنے جوانوں کی غیر معمولی ہمت، حکمت عملی کی مہارت اور فرض کی غیر متزلزل لگن کے ساتھ رہنمائی کی،ان کی عظیم قربانی بہادری اور حب الوطنی کی لازوال علامت بنی ہوئی ہے۔

پاکستان کی مسلح افواج ان کی لازوال میراث کا احترام کرتی ہیں اور ان کی بے مثال بہادری کو سلام پیش کرتی ہیں جو افسران اور سپاہیوں کی نسلوں کو متاثر کرتی ہے۔

(جاری ہے)

ان کی زندگی ، خدمات، غیرت اور قربانی فوجی اقدار کی مظہر تھی۔اس موقع پر قوم اپنے اس بہادر بیٹے کو خراج عقیدت پیش کرتی ہے جس کی بے لوث جرات ،پاک فوج کے جذبہ قربانی اور جنگی اخلاق کا بنیادی ستون بن گئی۔آئی ایس پی آرکے مطابق مسلح افواج پاکستان کی خودمختاری اور علاقائی سالمیت کے تحفظ کے لیے اپنے غیر متزلزل عزم کا اعادہ کرتی ہیں۔کیپٹن محمد سرور شہید (نشان حیدر) جیسے شہداء کی عظیم وراثت سے تقویت حاصل کرتی ہیں۔