ڈیرہ غازی خان پولیس کی بڑی کارروائی، انتہائی مطلوب دہشت گرد بلال کھوسہ ہلاک

پیر 4 اگست 2025 09:00

ڈیرہ غازی خان (اُردو پوائنٹ اخبارتازہ ترین - اے پی پی۔ 04 اگست2025ء) ڈیرہ غازی خان پولیس نے پیشہ ورانہ کارروائی میں دہشت گردی، سنگین جرائم اور پولیس اہلکاروں کی ٹارگٹ کلنگ کی منصوبہ بندی میں ملوث انتہائی مطلوب دہشت گرد بلال کھوسہ عرف بشیر فائرنگ کو تبادلے کے دوران ہلاک کر دیا۔ترجمان پولیس کے مطابق کارروائی تھانہ کالا کی حدود میں واقع سیمنٹ فیکٹری روڈ، موضع چک لادن کے قریب کی گئی۔

پولیس ٹیم معمول کے گشت اور انسدادِ جرائم کی ڈیوٹی پر مامور تھی کہ جھاڑیوں میں چھپے نامعلوم مسلح افراد نے اچانک پولیس موبائل پر اندھا دھند فائرنگ شروع کر دی۔ پولیس نے فوری حکمت عملی اپناتے ہوئے جوابی کارروائی کی۔فائرنگ کے تبادلے کے دوران ایک حملہ آور مارا گیا، جس کی شناخت بلال کھوسہ عرف بشیر کے نام سے ہوئی، جب کہ اس کے دیگر ساتھی پسپا ہو کر فرار ہو گئے۔

(جاری ہے)

پولیس نے علاقے میں سرچ آپریشن کا آغاز کر دیا ہے تاکہ مفرور ملزمان کو گرفتار کیا جا سکے۔ترجمان نے مزید بتایا کہ مارا جانے والا دہشت گرد بلال کھوسہ اقدامِ قتل، ڈکیتی، راہزنی، دہشت گردی اور دوہرے قتل جیسے سنگین جرائم میں ملوث تھا۔ وہ کاؤنٹر ٹیررزم ڈیپارٹمنٹ (سی ٹی ڈی ) کو بھی مطلوب تھا اورانٹیلی جنس رپورٹس کے مطابق، بلال کھوسہ کا تعلق دہشت گرد تنظیم تحریک طالبان پاکستان ( ٹی ٹی پی ) سے تھا۔ وہ ڈیرہ غازی خان میں پولیس اور حساس اداروں کے اہلکاروں کی ٹارگٹ کلنگ کی منصوبہ بندی کر چکا تھا۔