کشمیریوں کا حق خودارادیت خطے میں پائیدار امن کے لیے ناگزیر ہے‘امیر العظیم

عبدالرشید ترابی کی قیادت میں ریلیف آرگنائزیشن فار کشمیری مسلمز کے وفد سے بات چیت

بدھ 6 اگست 2025 20:35

لاہور (اُردو پوائنٹ اخبارتازہ ترین - این این آئی۔ 06 اگست2025ء)جماعت اسلامی پاکستان کے سیکرٹری جنرل امیر العظیم نے اس عزم کا اعادہ کیا ہے کہ جماعت اسلامی کشمیرکا ز کے لیے اپنی کوششیں جاری رکھے گی، کشمیریوں کا حق خودارادیت خطے میں پائیدار امن کے لیے ناگزیر ہے، امیر العظیم کشمیری فلاحی ادارے ریلیف آرگنائزیشن فار کشمیری مسلمز کے وفد سے منصورہ میں بات چیت کر رہے تھے۔

وفد میں جماعت اسلامی آزاد کشمیر کے سابق امیر عبدالرشید ترابی ریلیف آرگنائزیشن فار کشمیری مسلمز کے چیئرمین نذیر احمد قرشی، وائس چیئرمین ثنا اللہ ڈار سیکرٹری جنرل،راجہ خالد محمود خان اور پروجیکٹ منیجر احمد حسین شامل تھے۔ وفد نے امیر العظیم سے ملاقات کے دوران انہیں کشمیر اور کشمیری مہاجرین کے حوالے سے مختلف امور بارے آگاہ کیا۔

(جاری ہے)

ریلیف آرگنائزیشن فار کشمیری مسلمز کے وفد نے جماعت اسلامی کے امیر حافظ نعیم الرحمن اور وقاص انجم جعفری سے بھی منصورہ میں ملاقات کی۔ ریلیف آرگنائزیشن فار کشمیری مسلمز کی پریس ریلیز کے مطابق تنظیم کے وفد نے تحریک آزادی اورآزاد کشمیر اور پاکستان میںمقیم کشمیر ی مہاجرین کے لیے فنڈ ریزنگ کی ایک مہم شروع کی ہے جس کی ابتدا میں سیالکوٹ میں جماعت اسلامی کے ضلع زعماء اورالخدمت فاونڈیشن کے ذمہ داروں اور بزنس کمیونٹی سے ملاقات ہوئی،فارورڈ سپورٹ کے مالک خواجہ مسعود اختر نے ایک پروگرام کا انعقاد کیاجس میں بزنس کمیونٹی کے معروف شخصیات شامل تھیں، اس خوبصورت پروگرام میں وفد نے تحریک کشمیر، مہاجرین مقیم کشمیر اور پاکستان کے حالات سے ان کو آگاہ بھی کیا اور ان کی ضروریات اور ان کی ضروریات کی طرف بھی توجہ دلائی گئی اور بھارت کے 5 اگست کے اقدامات کے حوالے سے بھرپور مذمت کی۔

یہ وفد اسی سلسلے کو اگے بڑھانے کے لیے کراچی کا دورہ بھی کر رہا ہے۔