انتقامی کارروائیاں عروج پر ہیں، پاکستان اور آزادی کی جنگ آخری دم تک لڑیں گے، علی امین گنڈاپور

دہشتگردی کا خاتمہ اور عوام کا اعتماد بحال کرنا اولین ترجیح ہے، جرگوں کا دائرہ مزید وسیع کیا جائے گا، عوام کی رائے فیصلہ کن ہوگی،وزیر اعلیٰ کے پی

اتوار 10 اگست 2025 17:35

پشاور(اُردو پوائنٹ اخبارتازہ ترین - این این آئی۔ 10 اگست2025ء) وزیراعلیٰ خیبر پختونخوا علی امین گنڈاپور نے کہا ہے کہ پاکستان تحریک انصاف کے خلاف انتقامی کارروائیاں عروج پر ہیں لیکن ہم ڈٹ کر کھڑے ہیں اور پاکستان اور آزادی کی جنگ آخری دم تک لڑیں گے۔وزیر اعلیٰ علی امین گنڈاپور نے اپنے بیان میں کہا کہ پاکستان میں آئین و قانون نام کی کوئی چیز باقی نہیں رہی، عوامی نمائندوں کو بلاوجہ نا اہل کرکے ان کے حقوق چھینے جا رہے ہیں۔

انہوںنے کہاکہ الیکشن کے دوران ملک بھر میں ہم سے مینڈیٹ چوری کیا گیا، فارم 47 کی مانگے تانگے کی حکومت ہم پر مسلط کی گئی۔انہوں نے کہا کہ سابق حکومتوں کی کرپشن کو ہمارے خلاف ہتھیار بنایا جا رہا ہے، کوہستان اسکینڈل صوبے کا نہیں بلکہ وفاق کا معاملہ ہے مگر الزام ہم پر ڈالا جا رہا ہے۔

(جاری ہے)

وزیر اعلیٰ خیبر پختونخوا نے کہا کہ ہمیں قرضوں میں ڈوبا ہوا اور تنخواہوں کے لالے پڑے صوبے کا چارج ملا، صوبے کو مالی تباہی سے نکال کر کامیابی کی طرف گامزن کر دیا ہے۔

علی امین گنڈا پور نے دعویٰ کیا کہ 17 ماہ میں صوبے نے 250 ارب روپے سے زیادہ آمدنی حاصل کرکے تاریخ رقم کی ہے، قرضوں کی ادائیگی کے لیے 190 ارب روپے کا انڈوومنٹ فنڈ قائم کیا اور ہدف 300 ارب روپے ہے، کے پی شفافیت، خدمت اور ترقی میں ملک بھر میں مثال بن چکا ہے۔انہوں نے کہا کہ دہشت گردی کا خاتمہ اور عوام کا اعتماد بحال کرنا سب سے بڑی ترجیح ہے، جرگوں کا دائرہ مزید وسیع کیا جائے گا، عوام کی رائے فیصلہ کن ہو گی۔

وزیر اعلیٰ کے پی نے کہا کہ پولیس اور فوج کے شہداء کا خون رائیگاں نہیں جائے گا، عوامی رائے اور جرگوں کی مشاورت سے مضبوط حکمت عملی تیار کریں گے۔انہوںنے کہاکہ رجیم چینج سے حکومت گرانے کے بعد پی ٹی آئی حالتِ جنگ میں ہے، ریاست مخالف قوتیں متحرک لیکن ہم ڈٹ کر مقابلہ کر رہے ہیں، انتقامی کارروائیاں عروج پر ہونے کے باوجود ہم پیچھے نہیں ہٹیں گے، یہ پاکستان اور آزادی کی جنگ آخری دم تک لڑیں گے۔