اس بار جشن آزادی فاتح کی حیثیت سے منانے جارہے ہیں، اپنی افواج پر فخر ہے۔وفاقی وزیر ریلوے حنیف عباسی کا جشن آزادی کے حوالے سے منعقدہ تقریب سے خطاب

منگل 12 اگست 2025 20:00

اسلام آباد (اُردو پوائنٹ اخبارتازہ ترین - اے پی پی۔ 12 اگست2025ء) وفاقی وزیر ریلوے حنیف عباسی نے کہا ہے کہ اس بار جشن آزادی فاتح کی حیثیت سے منانے جارہے ہیں،مجھے اپنی فوج پر فخر ہے، پاکستان دنیا میں طاقتور کا مانا جاتا ہے۔ان خیالات کا اظہار انہوں نے راولپنڈی آرٹس کونسل میں جشن آزادی کے حوالے سے منعقدہ تقریب سے خطاب کرتے ہوئے کیا۔انہوں نے کہا کہ معرکہ حق کے بعد پاکستان نے اسلامی ممالک میں نمایاں حیثیت حاصل کر لی ہے، بھارتی ائیر چیف نے خواب دیکھ کر کہا کہ ہم نے چھ جہاز گرائے جبکہ دنیا نے مانا اور کہا کہ ہم نے بھارت کے چھ جہاز گرائے۔

انہوں نے کہا کہ بھارت اس خطے کا غنڈہ تھا جس سے ہم نے اپنا حق چھینا ہے،ہمارا پانی روکا گیا تو بھارت کا ڈیم اڑانے کے لئے دس میزائل فائر کریں گے۔

(جاری ہے)

وفاقی وزیر نے مزید کہا کہ آج بنگلہ دیش میں پاکستان کا زندہ باد کا نعرہ لگ رہا ہے،کشمیر والوں سے آزادی اور غلامی کا فرق پوچھیں۔ انہوں نے کہا کہ ہندوستان میں آج کہرام ہے کہ ہمارے پاس جہاز اور فوج سب کچھ زیادہ تھا تو ہم کیسے ہار گئے، اربوں ڈالر لیبیا اور شام کے پاس بھی تھے مگر جنگ پیسوں سے نہیں جیتی جاتی۔

وفاقی وزیر نے کہا کہ پنجابی ہو، بلوچی ہو یا کشمیری ہو، ہر پاکستانی معرکہ حق میں پاک آرمی ساتھ کھڑا تھا۔ انہوں نے کہا کہ ہندوستان اپنی پراکسی کے ذریعے مظلوم شہریوں کو بسوں سے اتار کر مار رہا ہے ۔ وفاقی وزیر ریلوے نے کہا کہ کئی لوگوں کی قسمت میں بدبختی لکھی جا چکی ہے،ہم نے کسی کو گالی دیئے بغیر جیل کاٹی،آج جو شخص جیل کاٹ رہا ہے وہ مجبوری سے جیل کاٹ رہا ہے اور گالیاں بھی دے رہا ہے۔

انہوں نے کہا کہ میں نے اپنے قائد کے ساتھ چار ماہ جیل کاٹی اتنا صابر کسی کو نہیں پایا، ہمارے لیڈر آف اپوزیشن نے پاکستان پر حملے کے بعد شادیانے بجائے،ہمارے شہداء کے مجسموں کو توڑنے والے سزا کے بعد اب سیاسی نہیں رہے۔وفاقی وزیر نے کہا کہ آپ سمجھ لیں کہ پاکستان اب مضبوط ہاتھوں میں ہے،اسلام آباد اور راولپنڈی میں صفائی ستھرائی اور ہسپتالوں کے نظام میں زمین آسمان کا فرق ہے،پونے دو ارب سے راولپنڈی کے ہسپتال اپ لفٹ ہونے جا رہے ہیں، ہم گالیوں کی بنیاد پر نہیں پرفارمنس کی بنیاد پر آپ کے سامنے بات کرتے ہیں۔انہوں نے کہا کہ راولپنڈی میں آج بیٹیوں کے لئے بہترین تعلیمی اور سفری سہولیات دستیاب ہیں۔