جشن آزادی معرکہ حق ، سکھر میں 3080 بچوں نے ہیومن فلیگ بنا کر ریکارڈ قائم کیا

سکھر (اُردو پوائنٹ اخبارتازہ ترین - اے پی پی۔ 13 اگست2025ء) سکھر کی تاریخ میں پہلا عظیم "ہیومن فلیگ" 3080 بچوں کا سبز ہلالی پرچم بنایا گیا ۔ یومِ آزادی اور معرکۂ حق کی حالیہ تاریخی کامیابی کے تسلسل میں بدھ کو سکھر میونسپل کارپوریشن کے زیر اہتمام آئی بی اے پبلک سکول سکھر میں ایک شاندار اور ولولہ انگیز تقریب کا انعقاد کیا گیا ،جو سکھر کی تاریخ میں اپنی نوعیت کی پہلی تقریب تھی۔

اس موقع پر 3080 سے زائد سکول کے طلباو طالبات نے سبز ہلالی پرچم کی شکل میں "ہیومن فلیگ" تشکیل دے کر ایک نیا ریکارڈ قائم کیا جو حب الوطنی، اتحاد اور یکجہتی کا شاندار مظہر تھا۔ یہ تقریب نہ صرف جشنِ آزادی کی خوشیوں کا حصہ تھی بلکہ اس نے حالیہ معرکۂ حق میں پاکستان کی شاندار کامیابی کو خراجِ تحسین پیش کرنے کا بھی شرف حاصل کیا۔

(جاری ہے)

فضا "پاکستان زندہ باد" اور "کشمیر بنے گا پاکستان" کے نعروں سے گونج اٹھی۔

بچے جنہوں نے سبز و سفید لباس زیبِ تن کیا تھا، کئی روز کی محنت کے بعد اس عظیم ہیومن فلیگ کی تکمیل کر کے حب الوطنی کا ایک لازوال منظر پیش کیا ۔ تقریب میں ترجمان سندھ حکومت و میئر سکھر بیرسٹر ارسلان اسلام شیخ، کمشنر سکھر ڈویژن عابد قریشی، ڈپٹی کمشنر نادر شہزاد خان، ڈپٹی میئر ڈاکٹر ارشد مغل، میونسپل کمشنر علی رضا انصاری، معزز افسران، اساتذہ اور والدین کی بڑی تعداد موجود تھی۔

معزز مہمانان نے طلبہ کے عزم، ڈسپلن اور محنت کو سراہا اور اس موقع کو سکھر کے لیے ایک تاریخی لمحہ قرار دیا۔ترجمان سندھ حکومت و میئر سکھر بیرسٹر ارسلان اسلام شیخ نے اپنے خطاب میں کہا کہ یہ منظر ہمیں قائداعظم محمد علی جناح کے اُس عزمِ مصمم کی یاد دلاتا ہے جس نے برصغیر کے مسلمانوں کو متحد کیا اور شہیدِ جمہوریت ذوالفقار علی بھٹو کی اُس جرتمند جدوجہد کا عکس ہے جس نے پاکستان کے دفاع اور عوامی حقوق کے لیے تاریخ رقم کی۔

آج یہ بچے، یہی ہماری اصل طاقت اور پاکستان کا مستقبل ہیں۔ انہوں نے مزید کہا کہ ہم سلام پیش کرتے ہیں اپنے عظیم فیلڈ مارشل اور بہادر افواجِ پاکستان کو جنہوں نے حالیہ معرکۂ حق میں دشمن بھارت کو شکستِ فاش دے کر نہ صرف پاکستانی عوام بلکہ پوری دنیا کو یہ پیغام دیا کہ پاکستان ناقابلِ تسخیر ہے۔ جنرل عاصم منیر کی جرأت مندانہ قیادت اور پاک فوج کے جانباز سپاہیوں کی قربانیاں ہمیشہ تاریخ میں سنہری حروف سے لکھی جائیں گی، ہم جلد 25,000 طلبہ کا ہیومن فلیگ بنا کر ایک اور ریکارڈ قائم کریں گے اور اس دن کا انتظار ہے جب کشمیر کی آزادی کی خوشخبری پورے پاکستان میں جشن کی لہر دوڑا دے گی ۔

تقریب میں بچوں کے ملی نغموں، حب الوطنی پر مبنی تقاریر اور نعرہ بازی نے ماحول کو مزید پرجوش بنا دیا۔ یہ تقریب اس لحاظ سے بھی اہمیت کی حامل تھی کہ سکھر کی تاریخ میں پہلی بار اس سطح اور تعداد کا ہیومن فلیگ بنایا گیا۔