پاکستانی سفارتخانہ ابوظہبی میں یوم آزادی کی 78 ویں سالگرہ کی تقریب ،سفیر فیصل نیاز ترمذی نے پرچم کشائی کی

اسلام آباد (اُردو پوائنٹ اخبارتازہ ترین - اے پی پی۔ 14 اگست2025ء) پاکستانی سفارتخانہ ابوظہبی میں یوم آزادی کی 78 ویں سالگرہ کی تقریب قومی جوش و جذبے کے ساتھ منائی گئی ،سفیر فیصل نیاز ترمذی نے پرچم کشائی کی ۔ تقریب میں پاکستانی کمیونٹی کے افراد اور ان کے اہل خانہ نے کثیر تعداد میں شرکت کی۔ سفارت خانے سے موصولہ اعلامیہ کے مطابق اس موقع پر قومی قیادت کے پیغامات پڑھ کر سنائے گئے۔

متحدہ عرب امارات میں پاکستان کے سفیر فیصل نیاز ترمذی نے مہمانوں کا پرتپاک استقبال کیا اور کمیونٹی کو اس پرمسرت موقع پر مبارکباد دی۔ انہوں نے پاکستان کی مسلسل سماجی و اقتصادی ترقی کی بنیاد کے طور پر اتحاد، ایمان اور نظم و ضبط کے رہنما اصولوں پر زور دیا اور پیارے وطن کی سلامتی، خوشحالی اور استحکام کے لیے دعا کی۔

(جاری ہے)

حالیہ بیرونی جارحیت کے مقابلے میں قوم کی طاقت، لچک اور اتحاد کو خراج تحسین پیش کرتے ہوئے فیصل نیاز ترمذی نے معرکہ حق اور آپریشن بُنیان مرصوص میں کامیابیوں کو تاریخی سنگ میل کے طور پر اجاگر کیا۔

انہوں نے کامیابیوں کو پاکستان کے غیر متزلزل قومی عزم اور پیشہ ورانہ مہارت کا طاقتور مظاہرہ قرار دیا۔ انہوں نے متحدہ عرب امارات کے قومی ترقی میں تعاون اور گزشتہ سال 7.9 ارب امریکی ڈالر کی ترسیلات زر کے ذریعے پاکستان کی معیشت میں اہم معاونت کو سراہتے ہوئے پاکستانی تارکین وطن پر زور دیا کہ وہ ملک کی ترقی میں اپنا تعمیری کردار برقرار رکھیں۔

مشن کی آئی ٹی ٹیم کی تعریف کرتے ہوئے سفیر فیصل نیاز ترمذی نے پاکستانی کمیونٹی کے لیے قونصلر خدمات کو مزید آسان بنانے کے لیے اوورسیز پاکستانیوں کے لیے ایک آن لائن پاسپورٹ اور قومی شناختی کارڈ (NICOP) ٹریکنگ سسٹم کے آغاز کا اعلان کیا۔ انہوں نے یہ بھی واضح کیا کہ دو کمیونٹی سکولوں نے 20 سالوں میں پہلی بار "اچھی" درجہ بندی حاصل کی ہے جو تعلیمی بہتری کے لیے اجتماعی کوششوں کا ثبوت ہے۔

انہوں نے بتایا کہ کمیونٹی کے لیے معیاری اور سستی تعلیم تک رسائی کے فروغ کے لیے مزید پاکستانی نجی سکولوں سے متحدہ عرب امارات میں شاخیں کھولنے کے لیے رابطہ کیا گیا ہے۔متحدہ عرب امارات کی حکومت سے اظہار تشکر کرتے ہوئے پاکستانی سفیر نے اس سال پاکستان کے یوم آزادی کی تقریبات کو بڑے پیمانے پر بے مثال بنانے میں ان کی حمایت کا اعتراف کیا۔

انہوں نے کہا 10 اگست کو دبئی ایکسپو سٹی میں منعقد ہونے والی تقریب میں تقریباً 60,000 افراد نے شرکت کی جو دنیا میں کہیں بھی منعقد ہونے والا پاکستان کے یوم آزادی کا سب سے بڑا اجتماع تھا۔تقریبات کے دوران سفیر فیصل نیاز ترمذی نے قائداعظم محمد علی جناح اور علامہ محمد اقبال کے پورٹریٹ کی نقاب کشائی کی جو منظور کے حسرت نے سفارت خانے کو تحفے میں دیے۔ تقریب میں سکول کے بچوں کی جانب سے قومی گیتوں کی پرفارمنس بھی پیش کی گئی جس سے حب الوطنی کا جوش و جذبہ دو بالا ہو گیا۔\932