ملک بھر کی طرح کراچی میں بھی 79واں یوم آزادی وجشن معرکہ حق ملی جوش و جذبے کے ساتھ منایا گیا

کراچی (اُردو پوائنٹ اخبارتازہ ترین - این این آئی۔ 14 اگست2025ء)ملک بھر کی طرح کراچی میں بھی 79واں یوم آزادی وجشن معرکہ حق ملی جوش و جذبے کے ساتھ منایا گیا۔یوم آزادی کے موقع پر یہ عہد تجدید کے ساتھ منایا گیا کہ ملک کو ایک حقیقی اسلامی فلاحی ریاست بنانے کے لیے تحریک پاکستان کے جذبے سے کام کیا جائے گا۔رواں سال یوم آزادی کو معرکہ حق کی عظیم فتح سے منسوب کیا گیا ہے۔

کراچی میں قومی جوش و جذبے اور احترامِ آزادی کے ساتھ تقاریب کا انعقاد کیا گیا۔ صبح کا آغاز نماز فجر کے ساتھ ہوا۔نماز فجر کے مساجد میں قرآن خوانی کی گئی ۔نمازِ فجر کے بعد وطن عزیز کی سلامتی، ترقی، خوشحالی اور اتحاد کے لیے خصوصی دعائیں کی گئیں۔پاک فوج کے چاق و چوبند دستے نے یوم آزادی کی صبح دشمن کو پیغام دینے والے انداز میں نعرہ تکبیر اللہ اکبر کے فلک شگاف نعروں کے ساتھ صوبائی دارالحکومت کراچی میں 21 توپوں کی سلامی دی۔

(جاری ہے)

یہ سلامی ملکی خودمختاری، قومی وقار، اور افواجِ پاکستان کی تیاری و قربانی کے عزم کی غماز سمجھی جاتی ہے۔گورنر سندھ کامران خان ٹیسوری ۔وزیراعلی سندھ سید مراد علی شاہ ۔صوبائی کابینہ ۔میئر کراچی مرتصی وہاب ۔ایم کیوایم پاکستان کے سربراہ و وفاقی وزیر ڈاکٹرخالدمقبول صدیقی سمیت دیگر مزار قائد اعظم پر حاضری دی۔پھولوں کی چادر چڑھائی اور فاتحہ خوانی کی۔

بانی پاکستان کو زبردست خراج عقیدت پیش کیا ۔اس موقع پر پرچم کشائی بھی کی گئی۔تینوں مسلح افواج کے نمائندوں نے مزار قائد پر حاضری دی۔انہوں نے پھولوں کی چادر چڑھائی اور فاتحہ خوانی کی۔جشن آزادی و معرکہ حق کے موقع پر شہری سڑکوں پر امڈ آئے۔ فضا پاکستان زندہ باد کے نعروں سے گونج اٹھی،چھوٹی بڑی ریلیوں اور مختلف ثقافتی شوز کا انعقاد کیا گیا، شہریوں نے ملی نغموں اور ڈھول کی تھاپ پر بھنگڑے ڈالے۔

دن بھر مزار قائداعظم پر مختلف سیاسی ۔مذہبی جماعتوں ۔سماجی تنظیموں اور شہریوں کی جانب بانی پاکستان کے مزار پر قائد اعظم پر حاضری دینے کا سلسلہ جاری رہا۔جشن آزادی اور معرکہ حق کے موقع پر شہر کو قومی پرچموں اور برقی قمقموں سے سجایا گیا تھا۔ مختلف تقریبات میں مقررین نے آزادی کی نعمت پر شکر گزاری اور اس کی حفاظت کے لیے قومی اتحاد، یکجہتی اور قربانی کے جذبے کو وقت کی اہم ضرورت قرار دیا۔مقررین نے جشن معرکہ حق میں مسلح افواج کی کامیابی پر ان کو زبردست خراج تحسین پیش کیا۔