سندھ کے بجٹ کا 97 فیصد دینے والے شہر قائد پر پیسہ نہیں لگایا جاتا، خالد مقبول

صوبے پر 17 سال سے ایک ہی پارٹی حکومت کررہی ہے لیکن کراچی کی حالت نہیں بدل سکی، رہنما ایم کیو ایم پاکستان کی میڈیا سے گفتگو

جمعرات 14 اگست 2025 18:35

کراچی (اُردو پوائنٹ اخبارتازہ ترین - این این آئی۔ 14 اگست2025ء)ایم کیو ایم پاکستان کے رہنما خالد مقبول صدیقی نے کہا ہے کہ سندھ کے بجٹ کا 97 فیصد دینے والے شہر قائد پر پیسہ نہیں لگایا جاتا۔یوم آزادی کے موقع پر مزار قائد پر حاضری کے بعد میڈیا سے گفتگو کرتے ہوئے خالد مقبول صدیقی نے کہا کہ ہم پر لازم ہے کہ بانی پاکستان کی جدوجہد کو یاد رکھیں۔ تینوں مسلح افواج نے پورے پاکستان کے عوام کو سرخرو کیا ہے۔

انہوں نے کہا کہ آزادی کسی نعرے کا نام نہیں، یہ ایک احساس کا نام ہے۔

(جاری ہے)

ایم کیو ایم پاکستان جشن آزادی کو مشن آزادی کی طرح مناتی ہے۔ ہماری بدقسمتی یہ ہے کہ ہماری قسمت کا فیصلہ کچھ خاندان کررہے ہیں۔سندھ حکومت پر تنقید کرتے ہوئے خالد مقبول صدیقی نے کہا کہ 17 سال سے ایک ہی پارٹی حکومت کررہی ہے، لیکن کراچی کی حالت بدل نہیں پائی۔ کراچی سندھ کے بجٹ کا 97 فیصد دیتا ہے پھر بھی اس شہر کے اوپر پیسہ نہیں لگایا جاتا۔انہوں نے کہا کہ کچھ لوگ سندھ کے علاقوں کو اپنی نااہلی کی وجہ سے تباہی کررہے ہیں۔ ہم کسی بھی قسم کے دیش بننے کے خلاف ہیں، اس کے سامنے دیوار ہیں۔ وزیر اعظم کو کہا ہے کہ اگر تبدیلی لانی ہے تو اس ایوان کو تبدیل کریں۔