17 اگست سے ملک بھر میں شدید بارشوں کا الرٹ، لینڈ سلائیڈنگ، طغیانی اور شہری علاقوں میں سیلاب کا خدشہ, محکمہ موسمیات

اسلام آباد (اُردو پوائنٹ اخبارتازہ ترین - اے پی پی۔ 16 اگست2025ء) محکمہ موسمیات نے آنے والے دنوں ملک میں شدید بارشوں کی پیشگوئی کرتے ہوئے 17 اگست سے مون سون کی شدت میں اضافے کا امکان ظاہر کیا ہے۔محکمہ موسمیات کے مطابق بحیرہ عرب اور خلیج بنگال سے مون سون ہوائیں مسلسل ملک میں داخل ہو رہی ہیں۔ 17اگست سے خلیج بنگال پر موجود ہوا کا کم دباؤ مغرب کی جانب بڑھے گاجوکہ مون سون کی سرگرمی کو مزید مضبو ط کردے گا۔

مغربی ہوائیں بھی ملک پر اثر انداز ہو رہی ہیں ۔ جس کے زیر اثر کشمیر /گلگت بلتستان میں17 سے19 اگست کے دوران کشمیر (وادی نیلم، مظفرآباد، راولاکوٹ، پونچھ، ہٹیاں، باغ، حویلی، سدھنوتی، کوٹلی، بھمبر، میرپور) اور گلگت بلتستا ن (دیامیر، استور، غذر، سکردو، ہنزہ، گلگت، گانچھے، شگر) میں تیز ہواؤں اورگرج چمک کے ساتھ وقفےوقفے سے اکثر مقا مات پر بارش جبکہ کہیں کہیں موسلادھار /شدید موسلادھار بارش کی بھی توقع ہے۔

(جاری ہے)

خیبر پختونخوا میں17 سے19 اگست کے دوران دیر، چترال، سوات، کوہستان، شانگلہ، بٹگرام، مانسہرہ، ایبٹ آباد، ہری پور، بونیر، مالاکنڈ، باجوڑ، مہمند، کوہاٹ، پشاور، چارسدہ، نوشہرہ، مردان، صوابی، خیبر، اورکزئی کرم، ہنگو ، کرک، بنوں، لکی مروت، وزیرستان، ٹانک اور ڈیرہ اسماعیل خان میں تیز ہواؤں اورگرج چمک کے ساتھ وقفےوقفے سے اکثر مقا مات پربارش جبکہ کہیں کہیں موسلادھار /شدید موسلادھار بارش کی بھی توقع ہے۔

پنجاب/اسلام آباد میں17 سے19 اگست کے دوران اسلام آباد/راولپنڈی، مری، گلیات، اٹک، چکوال، جہلم، منڈی بہاؤالدین، گجرات، گوجرانوالہ، حافظ آباد، وزیر آباد، لاہور،قصور، شیخوپورہ، سیالکوٹ ،نارووال میانوالی، خوشاب، سرگودھا، جھنگ، ٹوبہ ٹیک سنگھ، ننکانہ صاحب، چنیوٹ، فیصل آباد اور ساہیوال میں تیز ہواؤں اورگرج چمک کے ساتھ وقفے وقفے سے اکثر مقا مات پربارش جبکہ کہیں کہیں موسلادھار /شدید موسلادھار بارش کا بھی امکان ہے۔

تاہم 18 سے20 اگست کے دوران ڈی جی خان، بھکر، لیہ، ملتان، بہاولپور، بہاولنگر، راجن پور اور رحیم یار خان میں بھی تیز ہواؤں اورگرج چمک کے ساتھ وقفے وقفے سے کہیں کہیں بارش اور چند مقا مات پر موسلادھار بارش کا امکان ہے۔سندھ میں17 سے 22اگست کے دوران مٹھی،تھرپارکر، عمر کوٹ، میرپورخاص، حیدرآباد، شہید بینظیر آباد، کراچی، ٹھٹھہ، بدین، سجاول، ٹنڈو االلہ یار، ٹنڈو محمد خان، سانگھڑ، جامشورو، سکھر، لاڑکانہ، خیرپور اور جیکب آباد میں تیز ہواؤں اور گرج چمک کے ساتھ وقفے وقفے سے بارش اور کہیں کہیں موسلادھار /شدید موسلادھار بارش کا بھی امکان ہے۔

بلوچستان میں17 سے21اگست کے دوران بارکھان، موسیٰ خیل، لورالائی، سبی، ژوب، قلعہ سیف اللہ، خضدار، لسبیلہ، آواران، کیچ، گوادر اور پنجگورمیں تیز ہواؤں اورگرج چمک کے ساتھ بارش اور چند مقا مات پر موسلادھار بارش کا بھی امکان ہے۔محکمہ موسمیات نے کہا ہے کہ ممکنہ اثرات اور احتیاطی تدابیر17 سے19اگست کے دوران شدید موسلادھار بارشوں کے باعث چترال، دیر، سوات، شانگلہ، مانسہرہ، کوہستان،ایبٹ آباد، بونیر،چارسدہ، صوابی، مردان، مری، گلیات، نوشہرہ، اسلام آباد/راولپنڈی، شمال مشرقی پنجاب اورکشمیر کے مقامی / بر ساتی ندی نالوں جبکہ 18 سے 21 اگست کے دوران ڈیرہ غازی خان کے پہاڑی ندی نالوں اور بلوچستان کے مشرقی علاقوں میں طغیانی کا خطرہ ہے۔

عوام الناس کو احتیاط کی ہدایت کی جاتی ہے۔17سے19اگست کے دوران طوفانی بارشوں کے باعث اسلام آباد/راولپنڈی، گوجرانوالہ، لاہور ،سیالکوٹ ، پشاور ، نوشہرہ اور 17سے22اگست کے دوران سندھ(تھرپارکر، عمر کوٹ، میرپورخاص، حیدرآباد، شہید بینظیر آباد، کراچی، ٹھٹھہ، بدین، سجاول، ٹنڈو االلہ یار، ٹنڈو محمد خان، سانگھڑ، جامشورو، سکھر، لاڑکانہ، خیرپور اور جیکب آباد ) کے نشیبی علا قے زیر آب آنے کاخدشہ ہے۔

اس دوران شدید بارشوں کے باعث خیبرپختونخوا کے پہاڑی علاقوں، گلگت بلتستان، مری ، گلیات اور کشمیر میں لینڈ سلائیڈنگ کے باعث ٹریفک کی آمدورفت متاثر ہونے کا خطرہ ہے۔شدید بارشوں ،آندھی، جھکڑ چلنے اورگرج چمک کے باعث روزمرہ کے معمولات متاثر ہونے ، کمزور انفرا سٹرکچر ( کچے گھر/دیواریں ،بجلی کے کھمبے،بل بورڈز،گاڑیوں سولر پینل وغیرہ)کو نقصان کا اندیشہ ہے۔

مسافروں اور سیاح حضرات سفر کے دوران زیادہ محتاط رہیں اور موسمی حالات کے مطابق اپنے سفر کا انتظام کریں اور بارشوں کے دوران کسی بھی ناخوشگوار صورتحال سے بچنے کے لیے موسم کے بارے میں آگاہی حاصل کریں۔تمام متعلقہ اداروں کو الرٹ رہنے اور کسی ناخوشگوار واقعے سے بچنے کے لیے تمام ضروری اقدامات کرنے کی ہدایت کی گئی ہے۔