عید میلاد النبی ﷺ مذہبی عقیدت و احترام کے ساتھ منائی جائیگی ،چیئرمین ڈسٹرکٹ کونسل سکھر

سکھر(اُردو پوائنٹ اخبارتازہ ترین - این این آئی۔ 18 اگست2025ء)ڈسٹرکٹ کونسل سکھر کے چیئرمین سید کمیل حیدر شاہ نے پریس کانفرنس کرتے ہوئے کہا ہے کہ وہ قوم کو یومِ آزادی اور معرکہ حق کی بھرپور مبارکباد پیش کرتے ہیں۔ انہوں نے اس عزم کا اظہار کیا کہ عید میلاد النبی ﷺ مذہبی عقیدت و احترام کے ساتھ منائی جائیگی ، ان خیالات کا اظہار انہوں نے سکھر پریس کلب میں کانفرنس کے دوران کیا ، سید کمیل حیدر شاہ کا مزید کہنا تھا کہ پاکستان پیپلز پارٹی 2008 سے ہر الیکشن میں بھاری اکثریت سے کامیابی حاصل کر رہی ہے جس کی بنیادی وجہ عوام دوست ترقیاتی کام ہیں۔

کراچی میں بنائے گئے انڈر پاسز اور دیگر منصوبے عوام کے سامنے ہیں اور ووٹر اب سمجھدار ہوچکا ہے۔ انہوں نے ایم کیو ایم کو مشورہ دیا کہ وہ تنقید کے بجائے اپنے کام گنوائیں سید کمیل شاہ کا کہنا تھا کہ سول اسپتال سکھر کی بہتری کیلئے عملی اقدامات کئے جارہے ہیں، جلد فنڈز ریلیز ہوں گے، جبکہ سرد خانہ ایک ماہ میں درست نہ ہوا تو ایکشن لیا جائے گا۔

(جاری ہے)

انہوں نے اعلان کیا کہ چھ ماہ میں سول اسپتال کی صورتحال میں نمایاں بہتری نظر آئے گی اور سول سوسائٹی پر مشتمل کمیٹی بھی قائم کی جارہی ہے، چیئرمین ڈسٹرکٹ کونسل سید کمیل حیدر شاہ مزیدبتایا کہ سستے کرایوں کے ساتھ ’’جمالو ایکسپریس‘‘ کے نام سے لوکو ٹرین جلد شروع کی جائے گی جبکہ ’ریلوے سلیون سکھر‘ کی تعمیر کیلئے وزیر ریلوے سے بات چیت ہوئی ہے۔

دسمبر تک سیف سٹی پروجیکٹ کے تحت جدید سی سی ٹی وی کیمروں کی تنصیب مکمل ہوجائے گی ان کا کہنا تھا کہ مون سون برسات کیلئے تمام تر انتظامات مکمل ہیں، پمپنگ اسٹیشنز تیار ہیں اور سیلابی صورتحال کی صورت میں احتیاطی تدابیر اختیار کی جارہی ہیں۔ایک سوال کے جواب میں انہوں نے کہا کہ صنم ماروی سندھ کی اہم گلوکارہ ہیں، ان کے اور احمد شاہ کے درمیان غلط فہمی کو دور کرایا جائے گا اور اگلے سکھر کنسرٹ میں صنم ماروی شرکت کریں گی۔ میوزیکل کنسرٹ میں بڑی تعداد میں لوگوں کی موجودگی اور انتظامیہ کی جانب سے وقت کم ہونے پر پروگرام جلد ختم کیا گیا۔آخر میں انہوں نے بتایا کہ روہڑی کیلئے صاف پانی کا منصوبہ لایا گیا ہے اور اگلے دو ماہ میں روہڑی کے عوام کو صاف پانی دستیاب ہوگا۔