فیلڈ مارشل عاصم منیر کا حالیہ دورہ پاک امریکہ تعلقات میں ایک نئی جہت کی علامت قرار

پاکستانی کامیاب سفارتکاری کی بدولت کالعدم تنظیم بی ایل پر امریکہ نے پابندی عائد کی، صدر ٹرمپ نے پاکستان میں مختلف شعبوں میں سرمایہ کاری میں دلچسپی کا اظہار کیا؛ واشنگٹن پوسٹ کی رپورٹ

ساجد علی بدھ 20 اگست 2025 14:34

فیلڈ مارشل عاصم منیر کا حالیہ دورہ پاک امریکہ تعلقات میں ایک نئی جہت ..

اسلام آباد ( اُردو پوائنٹ اخبارتازہ ترین۔ 20 اگست 2025ء ) پاک فوج کے سربراہ فیلڈ مارشل عاصم منیر کے حالیہ دورے کو پاک امریکہ تعلقات میں ایک نئی جہت کی علامت قرار دے دیا گیا۔ تفصیلات کے مطابق پاکستان اور امریکہ کے تعلقات ایک نئے دور میں داخل ہو چکے ہیں، جسے بین الاقوامی ذرائع ابلاغ اور تجزیہ کارفیلڈ مارشل سید عاصم منیر کی اہم سفارتی حکمت قراردے رہے ہیں، اس حوالے سے معروف امریکی جریدے واشنگٹن پوسٹ نے اپنی حالیہ رپورٹ میں پاکستان کی خارجہ پالیسی اور فیلڈ مارشل سید عاصم منیر کی قیادت میں ہونے والی سفارتی کوششوں کو قابلِ ستائش قرار دیا۔

واشنگٹن پوسٹ نے رپورٹ میں کہا کہ فیلڈ مارشل عاصم منیر کا حالیہ دورہ امریکہ پاک امریکا تعلقات میں ایک نئی جہت کی علامت بن چکا ہے، بدلتے ہوئے عالمی منظرنامے اور سابق امریکی صدر ڈونلڈ ٹرمپ کے ممکنہ دوبارہ انتخاب کو پاکستان کے لیے ایک چیلنج تصور کیا جا رہا تھا، تاہم پاکستانی حکام نے دانشمندانہ حکمت عملی کے تحت وائٹ ہاؤس کے ساتھ قریبی روابط کو فروغ دیا۔

(جاری ہے)

بتایا جارہا ہے کہ واشنگٹن پوسٹ نے انسداد دہشتگردی میں پاکستان کے اقدامات کو سراہا اور اس کے نتیجے میں امریکہ نے کالعدم تنظیم ’بی ایل اے‘ کو عالمی دہشتگرد تنظیم قرار دے دیا جو پاکستانی سفارت کاری کی ایک بڑی کامیابی سمجھی جا رہی ہے، اس کے علاوہ پاکستان نے امریکہ کو کرپٹو کرنسی کے منصوبوں اور معدنی وسائل کی ترقی میں شراکت داری کی پیشکش کی ہے۔

امریکی جریدے کی رپورٹ سے معلوم ہوا ہے کہ صدر ٹرمپ نے پاکستان میں مختلف شعبوں میں سرمایہ کاری میں دلچسپی ظاہر کی ہے جو دونوں ممالک کے درمیان معاشی تعلقات کے نئے دور کا آغاز ثابت ہو سکتا ہے، بھارت کے ساتھ جنگ بندی کے بعد پاک، امریکا تعلقات میں مزید بہتری آئی ہے جو خطے میں امن و استحکام کے لیے نیک شگون تصور کیا جا رہا ہے، پاکستان کی یہ سفارتی کامیابیاں نہ صرف خطے میں اس کے کردار کو مضبوط کر رہی ہیں بلکہ عالمی سطح پر اس کی مثبت شبیہ کو بھی اجاگر کر رہی ہیں۔