ہمارے ٹیکسوں سے شہر نہیں جائیدادیں بنائی گئیں،آفاق احمد

کراچی کو بارش نے نہیں پی پی کی کرپشن نے ڈبویا،شہری سندھ کے عوام کا اپنے وسائل پر اختیار ناگزیر ہوچکا

بدھ 20 اگست 2025 22:00

کراچی (اُردو پوائنٹ اخبارتازہ ترین - این این آئی۔ 20 اگست2025ء) مہاجر قومی موومنٹ (پاکستان)کے چیئرمین آفاق احمد نے ایک دن کی بارش میں کراچی کی تباہی اور 9شہریوں کے جاں بحق ہونے پر دلی دکھ کا اظہار کرتے ہوئے کہا کہ شہریوں کی ہلاکتوں اور شہر کی تباہی کی ذمہ دار پیپلز پارٹی کی کرپٹ حکومت ہے جس نے عوام کے ٹیکسوں کی رقم شہروں کو بنانے پر خرچ کرنے کے بجائے اپنی جائیدادیں بنانے میں خرچ کیا۔

(جاری ہے)

آفاق احمد نے کہا کہ ہم نے جب پی پی کی بدعنوانیوں اور نسلی امتیاز کی نشاندہی اور اسکے خلاف پرامن احتجاج کیا تو اسے لسانی رنگ دینے کی کوشش کی گئی۔ آفاق احمد نے کہا کہ سندھ کے شہری علاقوں کے مسائل کا واحد حل پی پی کے بدعنوان حکمرانوں نے نجات اور سندھ کے شہری علاقوں کے وسائل پر سندھ کے شہری عوام کا مکمل اختیار ہے، اس مقصد کے حصول کیلئے سندھ کے شہری عوام علیحدہ صوبے کے حصول سمیت کسی بھی حد تک جانے کو تیار ہیں۔ انہوں نے کہا کہ جو لوگ کراچی کو لاوارث اور مہاجروں کو تقسیم سمجھتے ہیں آنے والے وقتوں میں انہیں پی پی کے نسلی امتیاز کے خلاف مہاجروں کا اتحاد اور جدوجہد حیران کردے گی۔