عمران خان کی نو مئی کے مقدمات میں ضمانت کی اپیلیں سننے والا بینچ تبدیل

اسلام آباد (اُردو پوائنٹ اخبارتازہ ترین۔ 21 اگست2025ء) پاکستان تحریک انصاف کے پیٹرن انچیف عمران خان کی نو مئی کے مقدمات میں ضمانت کی اپیلیں سننے والا بینچ تبدیل کردیا گیا۔ تفصیلات کے ماطقب چیف جسٹس پاکستان یحییٰ آفریدی کی سربراہی میں کیس سننے والے سپریم کورٹ کے تین رکنی بینچ میں تبدیلی کی گئی ہے، تین رکنی بینچ میں جسٹس میاں گل حسن اورنگزیب کی جگہ اب جسٹس حسن اظہر رضوی کو شامل کیا گیا ہے، چیف جسٹس پاکستان یحییٰ آفریدی کی سربراہی میں 3 رکنی بینچ اب کیس کی سماعت کرے گا۔

گزشرہ روز سپریم کورٹ نے سپیشل پراسیکیوٹر کے فوڈ پوائزنگ کا شکار ہونے کے باعث تحریک انصاف کے پیٹرن انچیف عمران خان کی ضمانت کی اپیلوں پر سماعت ملتوی کردی تھی، سپریم کورٹ میں سابق وزیراعظم عمران خان کی ضمانت کی درخواستوں پر سماعت ہوئی تھی جہاں معاون وکیل نے بتایا کہ ’سپیشل پراسیکیوٹر زوالفقار نقوی کو فوڈ پوائزنگ ہو گئی ہے، جس کی وجہ سے وہ آج عدالت نہیں آئے، اس لیے کیس کی سماعت اگلے ہفتے تک ملتوی کریں‘۔

(جاری ہے)

چیف جسٹس یحییٰ آفریدی نے ریمارکس دیئے کہ ’کل سماعت رکھ رہے ہیں، کل دیکھ لیں گے‘، اس دوران سپریم کورٹ نے بانی پی ٹی آئی عمران خان کی بہنوں کو عدالت میں بات کرنے کی اجازت دینے کی استدعا مسترد کردی اور کیس کی سماعت کل ساڑھے دس بجے تک ملتوی کردی گئی۔ اس سے پہلے سپریم کورٹ نے نو مئی کے مقدمات میں سابق وزیراعظم عمران خان کی اپیلوں پر فریقین کو آج ہی دستاویزات جمع کرانے کا حکم دیا تھا، سپریم کورٹ میں چیف جسٹس یحییٰ آفریدی کی سربراہی میں 3 رکنی بینچ نے پاکستان تحریک انصاف کے پیٹرن انچیف عمران خان کی نو مئی سے متعلق ضمانت کی اپیلوں پر سماعت کی، اس حوالے سے وکیل درخواست گزار سلمان صفدر اور سپیشل پراسیکیوٹر ذوالفقار نقوی عدالت میں پیش ہوئے تھے، عمران خان کی ہمشیرہ علیمہ خان بھی اس موقع پر عدالت میں موجود تھیں۔

دوران سماعت جسٹس یحییٰ آفریدی نے سلمان صفدر سے مکالمہ کرتے ہوئے کہا تھا کہ ’آپ نے دستاویزات جمع کروائے تھے، کل ساڑھے 10 بجے تک دستاویزات کو دیکھ لیتے ہیں، ہمیں بھی تو دستاویزات کو پڑھنا ہے کیوں کہ آپ نے جو کچھ دستاویزات جمع کروائے ہیں، میں ان کو دیکھ نہیں سکا، ایسا کرتے ہیں کیس کی سماعت کل ساڑھے 11 بجے تک ملتوی کردیتے ہیں‘۔ اس پر وکیل سلمان صفدر کا کہنا تھا کہ ’چند فیصلوں کے حوالے سے دستاویزات جمع کروائے ہیں‘، اس پر چیف جسٹس یحییٰ آفریدی نے کہا کہ ’اس حوالے سے مزید بھی اگر کسی فریق نے کوئی بھی دستاویزات جمع کرانے ہیں تو وہ آج ہی کرادے، اس کے علاوہ پراسیکیوشن بھی ملزم کی طرف سے جمع کرائی گئی دستاویزات کا جائزہ لے لیں‘، بعد ازاں سپریم کورٹ نے اپیلوں پر سماعت ملتوی کردی تھی۔