چین کو پاکستان کی خارجہ پالیسی میں کلیدی اہمیت حاصل ہے، اسحاق ڈار

اسلام آباد(اُردو پوائنٹ اخبارتازہ ترین - این این آئی۔ 21 اگست2025ء)نائب وزیر اعظم اسحق ڈار اورچینی وزیر خارجہ وانگ ژی نے کہاہے کہ چین کو پاکستان کی خارجہ پالیسی میں کلیدی اہمیت حاصل ہے، پاکستان کی سالمیت اور خودمختاری کے تحفظ کیلئے چین کے عزم کو سراہتے ہیں،سی پیک کو ہائی کوالٹی تعاون میں لے کر جا رہے ہیں، صنعت، زراعت اور مائننگ کے شعبوں میں تعاون پر اتفاق ہوا ہے۔

جمعرات کوچینی وزیر خارجہ وانگ ڑی کے ہمراہ مشترکہ پریس کانفرنس کرتے ہوئے اسحق ڈار نے کہا کہ چین کے وزیر خارجہ کی پاکستان آمد کا خیرمقدم کرتے ہیں، ان کے ساتھ مفید بات چیت ہوئی، ملاقات میں باہمی دلچسپی کے امور پر بات چیت کی گئی۔انہوں نے کہا کہ سی پیک سمیت پاک چین تعلقات سے متعلق تمام پہلوؤں کا جائزہ لیا گیا، خطے کے امن و استحکام اور خوشحالی کیلئے مل کر کام کرنے کیلئے پٴْرعزم ہیں، تمام اہم معاملات پر اتفاق رائے موجود ہے۔

(جاری ہے)

انہوںنے کہاکہ ہم نے وزیراعظم کے دورہ چین سے متعلق بھی گفتگو کی، سی پیک فیز 2، عوامی سطح پر روابط اور دوطرفہ تعاون کو وسعت دینے کیلئے پٴْرعزم ہیں، سلامتی کونسل سمیت مختلف فورمز پر ایک دوسرے کی حمایت کیلئے پٴْرعزم ہیں۔اسحق ڈار نے کہا کہ چین کے ساتھ تجارت کو مزید فروغ دینے کے خواہاں ہیں، علاقائی امن و استحکام ہمارا مشترکہ ہدف ہے۔

اس موقع پر گفتگو کرتے ہوئے چینی وزیر خارجہ وانگ ژی نے کہا کہ چین پاکستان کو اپنا قابل اعتماد اتحادی تصور کرتا ہے، پاکستان کے ساتھ تعلقات کو نئی بلندیوں تک لے جا رہے ہیں۔انہوں نے کہا کہ انسداد دہشت گردی کے شعبے میں تعاون کو مزید بڑھائیں گے، سی پیک فیز ٹو پر بھی ملاقات میں تفصیلی گفتگو ہوئی، وزیراعظم شہباز شریف کے دورہ چین کے منتظر ہیں، پاکستان اور چین کے درمیان اسٹریٹجک شراکت داری مضبوط ہو رہی ہے۔

چینی وزیر خارجہ نے کہاکہ دونوں ملکوں کے درمیان مختلف امور پر گفتگو ہوئی، شاندار میزبانی پر شکر گزار ہوں، سیلاب متاثرین کی بحالی کے لیے تعاون کریں گے، پاکستان کے سیلاب متاثرین کے ساتھ اظہار ہمدردی کرتے ہیں ۔انہوںنے کہاکہ سی پیک کو ہائی کوالٹی تعاون میں لے کر جا رہے ہیں، صنعت، زراعت اور مائننگ کے شعبوں میں تعاون پر اتفاق ہوا ہے، تمام پہلوؤں پر ہمارا مؤقف یکساں تھا۔