وزیرداخلہ محسن نقوی سے امریکہ کی قائم مقام سفیر نیٹلی بیکر کی ملاقات،پاک امریکہ تعلقات اور انسداد منشیات کے حوالے سے اشتراک کار پر تبادلہ خیال

جمعرات 21 اگست 2025 19:12

اسلام آباد (اُردو پوائنٹ اخبارتازہ ترین - این این آئی۔ 21 اگست2025ء)وفاقی وزیرداخلہ محسن نقوی سے امریکہ کی قائم مقام سفیر نیٹلی بیکر نے اہم ملاقات کی جس میں پاک امریکہ تعلقات،انسداد دہشت گردی اور انسداد منشیات کے حوالے سے اشتراک کار پر تبادلہ خیال کیا گیا۔قائم مقام امریکی سفیر نیٹلی بیکر نے نشان امتیاز ملنے پر وزیر داخلہ محسن نقوی کو مبارکباد دی اور وزیر داخلہ کے لئے نیک خواہشات کا اظہار کیا۔

قائم مقام امریکی سفیر نے پاکستان خصوصا خیبرپختونخوا میں بارشوں و سیلابی ریلوں کے باعث جانی نقصان پر اظہار افسوس کیا۔ انہوںنے کہاکہ ہماری تمام تر ہمدردیاں جاں بحق افراد کے خاندانوں کے ساتھ ہیں۔اس موقع پر وزیرداخلہ محسن نقوی نے پائیدار عالمی امن کیلئے مخلصانہ اقدامات پر امریکی صدر ڈونلڈ ٹرمپ کی غیر معمولی کاوشوں کو سراہا۔

(جاری ہے)

انہوںنے کہاکہ پاک بھارت سمیت 4 جنگیں رکوا کر امریکی صدر ڈونلڈ ٹرمپ نے انسانیت کی خدمت کی ہے۔

امید ہے کہ امریکی صدر ڈونلڈ ٹرمپ کی روس یوکرائن اور غزہ میں جنگ بندی کی کاوشیں بار آور ہوں گی۔ محسن نقوی نے کہا کہ امریکی صدر ڈونلڈ ٹرمپ کے دور میں پاک امریکہ تعلقات میں وسعت اور گرمجوشی آئی ہے۔ پاکستان امن کیلئے اٹھائے ہر قدم کا خیر مقدم کرتا ہے۔ قائمقام امریکی سفیر نے کہا کہ پاکستان ہمارا اہم دوست ملک ہے۔ پاکستان کے ساتھ تعلقات کو خصوصی اہمیت دیتے ہیں۔