صدر مملکت آصف علی زرداری سے چینی وزیر خارجہ کی ملاقات ، پاک۔چین "آہنی بھائی چارے" کی توثیق

اسلام آباد (اُردو پوائنٹ اخبارتازہ ترین - اے پی پی۔ 21 اگست2025ء) صدر مملکت آصف علی زرداری نے کہا ہے کہ پاکستان اور چین آہنی بھائی، وقت کے آزمودہ دوست اور سدا بہار تزویراتی شراکت دار ہیں اور چین کے ساتھ دوستی پاکستان کی خارجہ پالیسی کا بنیادی ستون ہے جسے پاکستان میں عوامی، سیاسی اور ادارہ جاتی سطح پر متفقہ حمایت حاصل ہے۔ ایوان صدر کے پریس ونگ سے جمعرات کو جاری بیان کے مطابق صدر مملکت آصف علی زرداری نے یہ بات ایوانِ صدر میں چین کے وزیر خارجہ اور سی پی سی کی مرکزی کمیٹی کے سیاسی بیورو کے رکن وانگ یی سے ملاقات کے دوران کہی۔

اس موقع پر چین کے نائب وزیر خارجہ سن ویڈونگ اور پاکستان میں چین کے سفیر جیانگ زائیڈونگ بھی موجود تھے۔ صدر مملکت نے پاکستان کی خودمختاری، علاقائی سالمیت، قومی ترقی اور جموں و کشمیر تنازعہ پر چین کے اصولی اور منصفانہ مؤقف کے لئے مسلسل حمایت پر چین کا شکریہ ادا کیا۔

(جاری ہے)

صدر نے بیجنگ اور چین کے صوبہ گانسو میں حالیہ سیلابوں میں قیمتی جانوں کے نقصان پر بھی افسوس اور ہمدردی کا اظہار کیا۔

صدر مملکت نے رواں سال کے اوائل میں اپنے دورہ چین کا ذکر کرتے ہوئے کہا کہ اس دوران ان کی صدر شی جن پنگ اور چین کی اعلیٰ قیادت سے کامیاب ملاقاتیں ہوئیں۔ یہ دورہ پاکستان۔چین آہنی بھائی چارے پر میرے اعتماد کا مظہر تھا۔ صدر مملکت نے کہا کہ اپنے گزشتہ دورِ صدارت میں انہوں نے چین کے 14 دورے کئے تاکہ ملک کی ترقی اور پیشرفت کو قریب سے سمجھ سکیں جو بعد ازاں پاک۔

چین اقتصادی راہداری (سی پیک) کے آغاز کا پیش خیمہ ثابت ہوئے۔ انہوں نے کہا کہ 2026 پاکستان اور چین کے درمیان سفارتی تعلقات کے قیام کی 75ویں سالگرہ ہے اور پاکستان اس اہم موقع کو شایانِ شان طریقے سے منانے کی منصوبہ بندی کر رہا ہے۔ انہوں نے کہا کہ دونوں ممالک اس موقع کو استعمال کرتے ہوئے پاک۔چین دوستی کی بہترین روایات اپنی نئی نسلوں تک منتقل کر سکتے ہیں۔

صدر مملکت نے سی پیک کو جو صدر شی جن پنگ کے فلیگ شپ بیلٹ اینڈ روڈ انیشی ایٹو کا حصہ ہے پاکستان اور چین دونوں کے لئے بے پناہ تزویراتی اہمیت کا حامل قرار دیا۔ انہوں نے کہا کہ سی پیک ہمارے باہمی وژن یعنی خطے میں بہتر روابط، اقتصادی انضمام اور پرامن ہمسائیگی کے خواب کو شرمندہ تعبیر کرنے کا ایک اہم جزو ہے۔اپنے خیالات کا اظہار کرتے ہوئے چین کے وزیر خارجہ وانگ یی نے کہا کہ چین اور پاکستان کی دوستی نسل در نسل قائم رہی ہے جو باہمی خیرسگالی، اعتماد اور مضبوط سدا بہار سٹریٹجک شراکت داری پر مبنی ہے۔

انہوں نے کہا کہ صدر شی جن پنگ کا وژن ہے کہ پاکستان اور چین کا مستقبل مشترکہ ہے اور دونوں ممالک کے عوام کو ایک دوسرے کے قریب لانے کے لئے کام ہونا چاہئے۔ انہوں نے کہا کہ چین، کلیدی مواقع پر پاکستان کی حمایت کو قدر کی نگاہ سے دیکھتا ہے۔ دونوں ممالک کے درمیان دوطرفہ تعاون اور علاقائی سلامتی سے متعلق امور پر بھی تبادلہ خیال کیا گیا۔ اس موقع پر نائب وزیر اعظم و وزیر خارجہ سینیٹر محمد اسحاق ڈار، وفاقی وزیر برائے منصوبہ بندی، ترقی و خصوصی اقدامات احسن اقبال، وفاقی وزیر داخلہ و انسداد منشیات سید محسن رضا نقوی، چیئرمین پیپلز پارٹی پارلیمنٹرینز بلاول بھٹو زرداری، رکن قومی اسمبلی حنا ربانی کھر، صدر مملکت کے ترجمان مرتضیٰ سولنگی، سیکرٹری خارجہ اور پاکستان کے سفیر برائے چین بھی موجود تھے۔