Live Updates

اگر یہ سوچتے ہیں بچوں کو اغواء کرکے ہمیں پریشرائز کرلیں گے تو یہ ان کی بھول ہے، علیمہ خان

یہ اگر مجھے گرفتار کرتے ہیں تو دراصل یہ خود کو پریشرائز کرلیں گے، پہلے ہی ان کے درمیان دراڑیں پڑ رہی ہیں، ہم پریشرائز نہیں ہوں گے؛ عمران خان کی ہمشیرہ کی میڈیا سے گفتگو

ساجد علی ہفتہ 23 اگست 2025 13:30

اگر یہ سوچتے ہیں بچوں کو اغواء کرکے ہمیں پریشرائز کرلیں گے تو یہ ان ..

لاہور ( اُردو پوائنٹ اخبارتازہ ترین۔ 23 اگست 2025ء ) پاکستان تحریک انصاف کے بانی چیئرمین عمران خان کی ہمیشرہ علیمہ خان کا کہنا ہے کہ اگر یہ سوچتے ہیں بچوں کو اغواء کرکے ہمیں پریشرائز کرلیں گے تو یہ ان کی بھول ہے۔ میڈیا سے گفتگو کرتے ہوئے انہوں نے کہا کہ کل میرے بڑے بیٹے کو 8 روزہ ریمانڈ پر بیجھا گیا اور اس کے بعدمیرے چھوٹے بیٹے کو اغواء کر لیا گیا اور آج اس کا 5 روزہ ریمانڈ دے دیا گیا ہے، شیر شاہ اور شاہریز کا جرم صرف یہ ہے کہ وہ عمران خان کے بھانجے ہیں، اگر یہ سوچتے ہیں کہ بچوں کو اغواء کرکے یہ عمران خان یا ہمیں پریشرائز کرلیں گے تو یہ ان کی بھول ہے، ہم پریشرائز نہیں ہوں گے۔

علیمہ خان کہتی ہیں کہ مجھے کسی نے کہا ہے کہ اب یہ آپ کو گرفتار کریں گے تو میرے تو پہلے ہی گرفاتی کے وارنٹ جاری ہوچکے ہوئے ہیں، اگر یہ مجھے گرفتار کرتے ہیں تو دراصل یہ خود کو پریشرائز کرلیں گے، آگے ہی ان کے درمیان دراڑیں پڑ رہی ہیں۔

(جاری ہے)

خیال رہے کہ پاکستان تحریک انصاف کے پیٹرن انچیف عمران خان کی ہمشیرہ علیمہ خان کے دوسرے بیٹے شیر شاہ کا بھی جسمانی ریمانڈ منظور کرلیا گیا، لاہور میں انسداد دہشت گردی عدالت کے جج منظر علی گل نے کیس کی سماعت کی، عدالت نے بانی پی ٹی آئی کے بھانجے شیر شاہ کے جسمانی ریمانڈ پر محفوظ فیصلہ سنایا جس میں عدالت نے ملزم کو پانچ دن کے جسمانی ریمانڈ پر پولیس کی تحویل میں دے دیا جب کہ اس سے ایک روز پہلے ان کے بھائی شاہ ریز کو بھی گرفتار کرکے ان کے خلاف مقدمہ درج کیا گیا جس پر عدالت نے ان کا جسمانی ریمانڈ منظور کیا تھا۔

دوسری طرف علیمہ خان کے بیٹوں کی گرفتاری پر ردعمل میں وزیرمملکت برائے داخلہ طلال چوہدری نے کہا کہ آپ کہہ سکتے ہیں پولیس نے انہیں دیر سے گرفتار کیا مگر آپ یہ نہیں کہہ سکتے کہ اُن کے کیسز جعلی تھے، دونوں 9 مئی کو جناح ہاؤس میں موجود تھے، پولیس کو شواہد اکٹھے کرتے کرتے اتنی دیر لگ گئی اگر کوئی شواہد نہیں ہوں گے تو انہیں ریلیف مل جائے گا۔