Live Updates

بھارت کی بدنیتی ہو سکتی ہے ،جتنا پانی آیا اسے روکنا کسی کے بس میں نہیں، خواجہ آصف

تین دہائیوں سے انسان قدرتی نظام میں مداخلت کر رہا ہے جس کی ہم قیمت ادا کررہے ہیں،نجی ٹی وی سے گفتگو

جمعرات 28 اگست 2025 21:40

اسلام آباد (اُردو پوائنٹ اخبارتازہ ترین - این این آئی۔ 28 اگست2025ء) وزیر دفاع خواجہ آصف نے کہا کہ بھارت کی بدنیتی ضرور ہو سکتی ہے لیکن جتنا پانی آیا ہے اسے روکنا کسی کے بس میں نہیں۔نجی ٹی وی سے گفتگو کرتے ہوئے خواجہ آصف نے کہا کہ دو تین دہائیوں سے انسان قدرتی نظام میں مداخلت کر رہا ہے جس کی ہم قیمت ادا کررہے ہیں۔خواجہ آصف نے کہا کہ آبی گزرگاہوں میں تعمیرات ہوں گی تو پانی بپھرے گا، کسی بھی ملک میں آبی گزرگاہوں پر تعمیرات ہوں تو حکومت کی ناکامی ہوتی ہے، بھارت اور دیگر ممالک میں بھی آبی گزرگاہوں میں تعمیرات پر آواز اٹھ رہی ہے، نقشے بن چکے ہیں کوشش کر رہے ہیں کہ تجاوزات ختم ہوں۔

انہوں نے کہا کہ قدرتی نظام میں مداخلت کا نتیجہ کوئی ایک ملک نہیں سارے ممالک کو برداشت کرنا ہو گا، سب کو سوچنا چاہیے کہ کب ایسا ہو گا کہ عوام کی دولت پوری ان پر خرچ ہو گی، وزیرِ اعظم اور پنجاب حکومت کا اولین ایجنڈا سرکاری پیسہ 100 فیصد ملکی ترقی پر خرچ کرنا ہے۔

(جاری ہے)

خواجہ آصف نے کہا کہ وہ شخص کہتا تھا کہ راوی نالہ بن جائے گا آج راوی پانی پانی ہو گیا، رہائشی کالونیوں کیلئے بڑی زمین پڑی ہے، آبی گزرگاہوں میں ہاوسنگ کے متحمل نہیں ہو سکتے۔

انہوں نے کہا کہ پانی ابھی آ رہا ہے، قادر آباد اور خانکی میں انہتائی اونچے درجے کے سیلاب کی پیشگوئی ہے، پی ٹی آئی کی قیادت کہتی ہے کہ بانی پی ٹی آئی ذاتی ایجنڈے کے سوا کچھ نہیں دیکھتے ۔ وزیر دفاع نے کہا کہ بھارت سے جنگ ہوئی مگر بانی پی ٹی آئی کا کوئی بیان نہیں آیا، ان کے تمام ارکانِ اسمبلی اپنی قیادت سے شاکی ہیں، بانی پی ٹی آئی صرف اپنے اقتدار کے گیم میں لگے ہوئے ہیں۔ انہوں نے کہا کہ نواز شریف نے جلا وطنی یا قید میں اپنی پارٹی کو بات چیت سے کبھی منع نہیں کیا، پی ٹی آئی کی سیاست ذاتی مقاصد کے تابع ہو چکی ہے، دنیا میں فراڈی اس لیے زندہ ہیں کہ ان کو وہ لوگ دستیاب ہیں جو ہتھے چڑھ جاتے ہیں۔