Live Updates

ملک میں مون سون کا نیا سپیل آگیا، لاہور سمیت مختلف علاقوں میں موسلا دھار بارش

صوبہ پنجاب کے کئی علاقوں میں بارش کی وجہ سے نشیبی علاقوں میں پانی جمع ہوگیا اور فیڈرز ٹرپ ہونے سے بجلی کی فراہمی بھی معطل ہوگئی

ساجد علی ہفتہ 30 اگست 2025 11:30

ملک میں مون سون کا نیا سپیل آگیا، لاہور سمیت مختلف علاقوں میں موسلا ..

لاہور ( اُردو پوائنٹ اخبارتازہ ترین۔ 30 اگست 2025ء ) ملک میں مون سون کا نیا سپیل آگیا جس کے باعث لاہور سمیت مختلف علاقوں میں موسلا دھار بارش ہوئی۔ تفصیلات کے مطابق صوبہ پنجاب کے دارالحکومت لاہور کے مختلف علاقوں میں وقفے وقفے سے بارش ہوئی، اس دوران لاہور کے علاقے کاہنہ میں آسمانی بجلی گرنے سے 2 افراد دم توڑ گئے، فیروزوالہ میں مکان کی چھت گرنے سے خاتون جاں بحق ہوگئی اور 3 افراد زخمی ہوئے۔

بتایا گیا ہے کہ فیصل آباد، نارووال، فیروز والا، بہاولنگر سمیت صوبہ پنجاب کے دیگر علاقوں میں بھی بادل جم کر برسے، جس کی وجہ سے نشیبی علاقوں میں پانی جمع ہوگیا اور کئی علاقوں میں فیڈرز ٹرپ ہونے سے بجلی کی فراہمی معطل ہوگئی، اسی طرح ملکہ کوہسار مری میں بھی وقفے وقفے سے موسلادھار بارش ہوئی، آزاد کشمیر کے مختلف علاقوں میں بھی بادل برس پڑے، میر پور اور باغ میں تیز بارش ہوئی، ندی نالوں میں طغیانی کا خطرہ بڑھ گیا، ایبٹ آباد سمیت خیبرپختونخواہ کے کئی علاقوں مین بھی موسلا دھار بارش ہوئی۔

(جاری ہے)

بتایا جارہا ہے کہ نیشنل ڈیزاسٹر مینجمنٹ اتھارٹی (این ڈی ایم اے) نے ملک بھر میں موسلادھار بارشوں کا الرٹ جاری کیا، ممکنہ شدید بارشوں کے باعث نشیبی علاقوں میں سیلاب اور پہاڑی علاقوں میں لینڈ سلائیڈنگ کا خدشہ ظاہر کردیا گیا، محکمہ موسمیات کا کہنا تھا کہ اسلام آباد میں ہفتے سے منگل تک گرج چمک کے ساتھ بارش ہوگی، پنجاب کے شمالی اور شمال مشرقی اضلاع بشمول لاہور اور سیالکوٹ میں اتوار اور پیر کو برسات کا امکان ہے، وسطی اور جنوبی پنجاب میں 29 سے 31 اگست کے دوران بارشوں کی پیشگوئی ہے۔

اسی طرح خیبرپختونخواہ، گلگت بلتستان اور آزاد کشمیر میں بھی شدید بارشوں کا امکان ہے، این ڈی ایم اے نے مالاکنڈ اور ہزارہ ڈویژن میں لینڈ سلائیڈنگ کے خدشے کے پیش نظر متعلقہ اداروں کو الرٹ رہنے کی ہدایت کردی، علاوہ ازیں صوبہ سندھ کے دارالحکومت کراچی میں بھی 30 اگست سے 2 ستمبر تک بارشوں کی پیشگوئی کی گئی ہے جہاں شدید بارشوں کے باعث اربن فلڈنگ اور سیلاب کے خدشات ظاہر کیے گئے ہیں جب کہ سندھ کے دیگر اضلاع اور بلوچستان میں بھی بادل برسنے کا امکان ہے۔