بھارتی میڈیاکا جھوٹا پروپیگنڈا بے نقاب،نیپال کی بہار میں نام نہاد دہشت گردوں کے داخلے کی تردید

کھٹمنڈو (اُردو پوائنٹ اخبارتازہ ترین - اے پی پی۔ 01 ستمبر2025ء) بھارتی میڈیا نے جھوٹا دعویٰ کیا تھا کہ لشکر طیبہ سے وابستہ تین پاکستانی دہشت گرد نیپال کے راستے ریاست بہار میں داخل ہوئے ہیں جس کی نیپال نے واضح تردید کی ہے۔کشمیرمیڈیاسروس کے مطابق نیپالی پولیس نے واضح کیا کہ تینوں پاکستانی شہری مختلف اوقات میں کٹھمنڈو سے کوالالمپور کے لیے روانہ ہو چکے ہیں جو بہار پولیس کے اس دعوے کی تردید ہے کہ وہ ریاست بہار میں داخل ہوئے۔

بھارتی میڈیا کے ادارے ''انڈیا ٹوڈے''نے سب سے پہلے یہ جھوٹی خبر پھیلائی کہ خفیہ اداروں نے بہار میں نیپال سے دہشت گردوں کے داخلے کا پتہ لگا یا ہے۔ تاہم اب انڈیا ٹوڈے خود رپورٹ کر رہا ہے کہ نیپالی پولیس نے اس کی تردید کر دی اور کہا کہ یہ دعویٰ جھوٹا تھا۔

(جاری ہے)

بھارتی میڈیا کی ساکھ بالکل ختم ہو چکی ہے جو پہلے ہی پاک بھارت تنازعے کے بعد سب سے نچلی سطح پر تھی۔

بھارتی میڈیا جھوٹی خبریں پھیلانے کی وجہ سے دنیا بھر میں مذاق کا باعث بن چکا ہے۔ بی جے پی کا خفیہ میڈیا ایجنڈا بے نقاب ہوگیا ہے جس کا مقصد دہشت گردی کا جعلی ڈرامہ رچاکربہار کے لوگوںکو خوفزدہ کر کے ووٹ حاصل کرنا تھا۔ بی جے پی میڈیا کے ذریعے پاکستان کے خلاف نفرت پھیلا کر اوراسے بدنام کرکے بہار کے انتخاب میں فائدہ اٹھانا چاہتی ہے لیکن نیپالی پولیس کی تردید سے مودی میڈیا کی یہ کوشش ناکام ہوگئی۔

بھارت کا جھوٹ ایک بار پھر رنگے ہاتھوں پکڑا گیا ۔بھارتی میڈیا متعدد بار تردید کے باوجود جھوٹا پروپیگنڈہ بند نہیں کرتا۔ یہ واضح ہے کہ گودی میڈیاصرف جھوٹ کا کارخانہ ہے۔ نیپالی پولیس نے بھارت کی گھڑی ہوئی کہانی کا پول کھول دیاجس سے بے بنیاد الزامات کی حقیقت سامنے آ گئی۔ اڑیسہ، اروناچل پردیش، ہماچل پردیش اور مقبوضہ جموں و کشمیر میں عوام سیلاب میں مر رہے ہیں اور ریلیف کے منتظر ہیں جبکہ بھارتی میڈیا جھوٹا پروپیگنڈا کرنے میں مصروف ہے اور خود کو دہشت گردی کا شکار ظاہر کر رہا ہے۔

ریسکیو آپریشن پر توجہ دینے کے بجائے بھارتی میڈیا یہ جھوٹی خبریں پھیلا رہا ہے کہ پاکستان کے نام نہاد دہشت گرد نیپال کے راستے بھارت میں داخل ہوئے جبکہ پاکستان سے ایک بھی دہشت گرد بھارت میں داخل نہیں ہوا۔نیپالی پولیس، امیگریشن ڈیپارٹمنٹ اور کٹھمنڈو ایئرپورٹ اتھارٹی نے تصدیق کی کہ تینوں پاکستانی شہری الگ الگ وقتوں میں کٹھمنڈو سے کوالالمپور روانہ ہوئے ہیں ۔

عادل، حسنین اور عثمان نوکری کے متلاشی شہری ہیں، لشکرِ طیبہ کے دہشت گرد نہیں اوروہ نیپال چھوڑ کر ملائیشیا پہنچ چکے ہیں۔پاکستان نے لشکرِ طیبہ کو 2022سے کالعدم قرار دے رکھا ہے اوربھارت کا بیانیہ انتہائی گمراہ کن اور سفارتی چالبازی ہے۔ بھارت جان بوجھ کر خوف ودہشت پھیلانے کی پالیسی پر عمل پیرا ہے تاکہ اپنی داخلی خامیوں کو چھپاسکے اور ہندو ووٹ بینک کو خوش کرسکے۔ بھارتی تحقیقاتی ادارے این آئی اے اور خفیہ ایجنسی'' را ''کی بار بار ناکامیاں نہ صرف ان کی نااہلی کی عکاسی کرتی ہیں بلکہ بھارت کے اندرونی سلامتی کے ڈھانچے پر سنگین سوالات بھی کھڑی کرتی ہیں۔