عافیہ صدیقی کیس، اسلام آباد ہائی کورٹ کا نیا بینچ بھی ٹوٹ گیا

جسٹس امین منہاس نے لارجر بینچ کی تشکیل کےلئے فائل چیف جسٹس کو ارسال کردی گئی

میاں محمد ندیم پیر 1 ستمبر 2025 15:23

عافیہ صدیقی کیس، اسلام آباد ہائی کورٹ کا نیا بینچ بھی ٹوٹ گیا

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔یکم ستمبر ۔2025 )ڈاکٹر عافیہ صدیقی کی صحت اور وطن واپسی کی سماعت کےلئے تشکیل دیا گیابینچ بھی ٹوٹ گیا ہے اوراسلام آباد ہائی کورٹ کے جسٹس انعام امین منہاس نے لارجر بینچ کی تشکیل کےلئے فائل چیف جسٹس کو بھجوا دی ہے کیس جسٹس سردار اعجاز اسحاق خان کی عدالت سے ٹرانسفر کیا گیا تھا جس بینچ نے عدالتی حکم عدولی پر وزیراعظم اور کابینہ ارکان کو توہین عدالت کے نوٹس جاری کر دئیے تھے.

(جاری ہے)

امریکی جیل میں قید ڈاکٹر عافیہ صدیقی کی صحت اور وطن واپسی کےلئے ان کی بہن ڈاکٹر فوزیہ صدیقی کی جانب سے دائر درخواست پر اسلام آباد ہائی کورٹ کے جسٹس انعام امین منہاس نے سماعت کی درخواست گزار کے وکیل عمران شفیق ایڈووکیٹ نے عدالت میں پیش ہو کر کہا کہ لارڈ شپ یہ معاملہ کافی پیچیدہ ہو گیا ہے جس پر عدالت نے کہا کوئی پیچیدہ نہیں ہوا، چیف جسٹس کے ماسٹر آف روسٹر کے حوالے سے میرا فیصلہ موجود ہے.

عمران شفیق ایڈووکیٹ نے کہا میں نے یہ فیصلہ نہیں پڑھا آپ نے کہا ہے کہ چیف جسٹس ماسٹر آف روسٹر ہے؟ جسٹس انعام امین منہاس نے کہا کہ منیب صاحب کی بھی یہی رائے تھی میں نے بھی وہی فیصلہ دیا ہے میرا فیصلہ ہے ماسٹر آف روسٹر چیف جسٹس ہے، دوسری رائے یہ آئی کہ وہ نہیں ہیں اب دو آرا کی وجہ سے یہ معاملہ لارجر بینچ کو بھیج رہا ہوں ماسٹر آف روسٹر کون ہے یہ لارجر بینچ ہی طے کرے گا.

واضح رہے کہ اس سے قبل یہ کیس جسٹس سردار اعجاز اسحاق خان کی عدالت میں زیر سماعت تھا اور ان کے بینچ نے عدالتی حکم عدولی پر وزیراعظم و کابینہ کو توہین عدالت نوٹس جاری کیے تھے جسٹس سردار اعجاز اسحاق سے سنگل بینچ کے تمام کیسز واپس لے کر انہیں جسٹس بابر ستار کی سربراہی میں ٹیکس کیسز والے اسپیشل ڈویژن بینچ کا حصہ بنا دیا گیا تھا اور ڈاکٹر عافیہ صدیقی کیس جسٹس انعام امین منہاس کی عدالت منتقل کر دیا تھا عدالت نے لارجر بینچ کی تشکیل کے لئے فائل چیف جسٹس کو بھجوا دی.