آزادی کی جو شمع سید علی گیلانی نے اپنے خون سے روشن کی ہم نے اسے بجھنے نہیں دینا،چوہدری انوارالحق

اسلام آباد(اُردو پوائنٹ اخبارتازہ ترین - این این آئی۔ 01 ستمبر2025ء)آزادجموں و کشمیر کے وزیراعظم چوہدری انوارالحق نے کہا ہے کہ آج پاکستان مانومینٹ کے مقام پر ایسے مرد حریت کی خدمات کو خراج عقیدت پیش کر رہے ہیں جنہوں نے ایک صدی پر محیط اپنی زندگی کا غالب حصہ آزادی کی جدوجہد میں گزارا، بابائے حریت کا نعرہ ''ہم پاکستانی ہیں پاکستان ہمارا ہی'' ہر کشمیری کے دل کی آواز ہے،آزادی کی جو شمع سید علی گیلانی نے اپنے خون سے روشن کی ہم نے اسے بجھنے نہیں دینا،پاکستانی سیاسی و عسکری قیادت کا عزم ہے کہ کشمیر کیلیے تین جنگیں لڑی سات اور لڑیں گے اس جذبے پر انہیں خراج تحسین پیش کرتا ہوں،مسلح افواج کے سربراہ فیلڈ مارشل سید عاصم منیر اور پاکستان کی سیاسی و عسکری قیادت کو بھی خراج تحسین پیش کرتا ہوں، نریندر مودی کو بھی بتانا چاہتا ہوں کہ تمہاری درندہ صفت بھارتی فوج اگر مقبوضہ کشمیر میں مظالم سے باز نہ آئی تو بھارتی فوج کو اندر گھس کر ماریں گے بلکہ اس بار وہاں مقیم بھی رہیں گے ،انہوں نے ان خیالات کا اظہار اسلام آباد مانومینٹ میں سید علی گیلانی کارنر پر میڈیا سے گفتگو کرتے ہوئے کیا۔

(جاری ہے)

اس موقع پر وزراء حکومت،چوہدری رشید،احمد رضا قادری،حریت قیادت جنرل سیکرٹری حریت کانفرنس ایڈووکیٹ پرویز احمد،سید یوسف نسیم،محترمہ شمیم شال،اعجاز رحمانی،سیکرٹری لبریشن سیل خالد محمود مرزا الطاف بٹ،عبدالحمید لون،امتیاز وانی،یونیورسل بشپ کونسل کے ارکان وسیم ویلیم،بشپ امانت،بشپ امانت،ویلسن وزیر،صدیق بھٹی،،سیاسی و سماجی رہنماء اور طلباء کی بڑی تعداد موجود تھی۔

وزیراعظم نے اس سے پہلے سید علی گیلانی کارنر کا معائنہ کیا اور بابائے حریت کے زیر استعمال اشیاء دیکھیں۔وزیراعظم آزاد کشمیر نے کہا کہ سید علی گیلانی بارہ سال تک پابند سلاسل رہے اور شہادت کا عظیم مرتبہ حاصل کیا،بھارتی فوج ان کے جسد خاکی سے بھی اس قدر خوفزدہ تھی کہ ان کی نماز جنازہ ادا نہیں کرنے دی گئی۔ان کے جسد خاکی کو ورثاء سے چھین لیا گیا اور فسطائیت کا مظاہرہ کرتے ہوئے رات کی تاریکی میں انہیں سپرد خاک کر دیا گیا لیکن اس کے باوجود اس مرد مجاہد کا نعرہ ''ہم پاکستانی ہیں پاکستان ہمارا ہی'' آج ہر کشمیری کا نعرہ ہے، آج اس مقام پر ان کے نام سے موجود ایک کارنر تشکیل دیا گیا جس میں ان کے زیر استعمال چیزیں موجود ہیں وہ جائے نماز جس پر وہ نماز پڑھتے تھے اور وہ قرآن پاک جس کا وہ مطالعہ کرتے تھے۔

ان کی یادوں کو محفوظ کرنے کیلیے یہ کارنر ایک ایسا عظیم کارنامہ ہے جو نسل نو کیلیے ایک مسلسل رہنمائی کا ذریعہ ثابت ہو گا۔انہوں نے کہا کہ جو قومیں اپنے اسلاف کو بھول جاتی ہیں ان کا وجود اور ان کی بقاء خطرے میں پڑ جاتی ہے۔میں ان منتظمین جنہوں نے یہ عظیم کارنامہ انجام دیا اور اس آئیڈیا کو حقیقت کا روپ دیا سب کو مبارکباد پیش کرتا ہوں،۔

وہ خواب جو سید علی گیلانی کی زندگی میں تشنہ رہا اسے پایہ تکمیل تک پہنچانے کیلیے ہم تحریک آزادی کشمیر سے مکمل طور پر جڑے ہیں اور جڑے رہیں گے۔انہوں نے کہا کہ آج جس دلیر،جری، بہادر اور نڈر مرد مجاہد کی یاد میں ہم اکٹھے ہوئے ہیں جہاد فی سبیل اللہ پر ان کا یقین پختہ تھا،انشائاللہ تحریک تکمیل پاکستان کو اس کے منطقی انجام تک پہنچائیں گے، وزیراعظم نے دوٹوک الفاظ میں کہا کہ نریندر مودی کو بتانا چاہتا ہوں کہ تمہاری درندہ صفت بھارتی فوج اگر مقبوضہ کشمیر میں مظالم سے باز نہ آئی تو بھارتی فوج کو اندر گھس کر ماریں گے بلکہ اس دفعہ وہاں مقیم بھی رہیں گے۔

انہوں نے کہا کہ مسلح افواج کے سربراہ فیلڈ مارشل سید عاصم منیر اور پاکستان کی سیاسی و عسکری قیادت کو بھی خراج تحسین پیش کرتا ہوں کہ جن کا عزم ہے کہ کشمیر کیلیے تین جنگیں لڑی ہیں سات اور لڑیں گے۔ہم اس عزم کا اعادہ کرتے ہیں کہ آزادی کی جو شمع سید علی گیلانی نے اپنے خون کا چراغ جلا کر روشن کی تھی ہم نے اسے بجھنے نہیں دینا۔اس موقع پر پاکستان زندہ باد،پاک فوج زندہ باد،ہم پاکستانی ہیں پاکستان ہمارا ہے اور کشمیر بنے گا پاکستان کے فلک شگاف نعرے لگائے گئے۔آخر میں شہداء کشمیر و پاک فوج اور تحریک آزادی کشمیر کی کامیابی کیلیے خصوصی دعا بھی کی گئی۔