پنجاب کے تین بڑے دریاﺅں میں سیلابی صورتحال برقرار

لاہور(اردوپوائنٹ اخبارتازہ ترین-انٹرنیشنل پریس ایجنسی۔05 ستمبر ۔2025 )پنجاب کے تین بڑے دریاﺅں میں سیلابی صورتحال برقرار ہے فلڈ فورکاسٹنگ ڈویژن کی جانب سے جاری رپورٹ کے مطابق دریائے جناب میں چنیوٹ، راوی میں بلوکی اور سدھنائی میں اونچے درجے جبکہ ستلج میں گنڈاسنگھ والا کے مقام پر انتہائی اونچے درجے کی سیلابی صورتحال کا سامنا ہے.

(جاری ہے)

محکمے کے مطابق دریائے چناب میں چنیوٹ کے مقام پر پانی کی سطح پانچ لاکھ 54 ہزار کیوسک سے زیادہ ہے اور اونچے درجے کے سیلاب کی صورتحال ہے جبکہ دریائے راوی میں بلوکی کے مقام پر پانی کی سطح ایک لاکھ 43 ہزار کیوسک سے زیادہ اور سدھنائی کے مقام پر پانی کی سطح ایک لاکھ 26 ہزار کیوسک سے زیادہ ہے اور راوی میں ان دونوں مقامات پر اس وقت اونچے درجے کا سیلاب کا سامنا ہے.

پنجاب کے تیسرے بڑے دریا ستلج میں گزشتہ روز انڈیا کی جانب سے مزید پانی چھوڑے جانے کے بعد گنڈا سنگھ والا کے مقام پر انتہائی اونچے درجے کے سیلاب کا سامنا ہے جہاں پانی کی سطح تین لاکھ 19 ہزار کیوسک سے زیادہ ہے قدرتی آفات سے نمٹنے والے قومی ادارے این ڈی ایم اے کی جانب سے گزشتہ روز پنجاب کے دریائے ستلج میں سیلاب کا الرٹ جاری کیا گیا تھا این ڈی ایم اے کا کہنا ہے کہ دریائے ستلج میں گنڈا سنگھ والا کے مقام پر پانی کا بہاﺅغیر معمولی طور پر بلند رہے گا.

دوسری جانب پاکستان کے سیلاب اور شدید بارشوں سے متاثرہ صوبے خیبر پختونخوا میں رواں ماہ 7 سے 9 ستمبر تک مزید بارشوں کی پیشگوئی کی گئی ہے صوبائی ڈیزاسٹر مینجمنٹ اتھارٹی (پی ڈی ایم اے) نے اس حوالے سے ہائی الرٹ بھی جاری کر دیا ہے. پی ڈی ای ایم اے خیبرپختونخوا نے محکمہ موسمیات کی پیشگوئی کی روشنی میں 7 ستمبر سے 9 ستمبر تک خیبرپختونخوا کے مختلف علاقوں میں وقفے وقفے سے مزید بارشوں، آندھی، گرج چمک اور بعض مقامات پر موسلادھار بارشوں کا امکان ظاہر کرتے ہوئے متعلقہ ضلعی انتظامیہ اور اداروں کو الرٹ رہنے کی ہدایت جاری کر دی ہے.

الرٹ کے مطابق اس دوران تیز بارشوں کے باعث بالائی و وسطی اضلاع گلیات، مانسہرہ، کوہستان (بالائی و زیریں)، کولائی پالس، ایبٹ آباد، بونیر، باجوڑ، بٹگرام، ہنگو، تورغر، ہری پور، کرک، چترال (بالائی و زیریں)، دیر (بالائی و زیریں)، سوات، شانگلہ، خیبر، کوہاٹ، نوشہرہ، صوابی، مردان، کرم، لکی مروت، ملاکنڈ، مہمند، اورکزئی، بنوں، وزیرستان (شمالی و جنوبی) اور ٹانک میں مقامی نالوں، برساتی چشموں اور دریاو¿ں میں فلیش فلڈ کا خدشہ ہے.

پی ڈی ایم اے کے مطابق پہاڑی علاقوں میں لینڈ سلائیڈنگ اور مقامی ندی نالوں، برساتی چشموں اور دریاو¿ں میں فلیش فلڈ کا خدشہ ہے جبکہ صوبہ کے شہری اور نیشبی علاقوں میں تیز بارشوں کے باعث اربن فلڈنگ کا بھی خدشہ ہے پی ڈی ایم اے نے ایک مراسلے کے ذریعے خبردار کیا ہے کہ تیز ہواﺅں اور گرج چمک کے باعث کمزور مکانات، بجلی کے کھمبے، اشتہاری بورڈز اور سولر پینلز کو نقصان پہنچ سکتا ہے.

اس سلسلے میں تمام ضلعی انتظامیہ کو ضروری احتیاطی اقدامات، نکاسی آب کے نظام کی صفائی، اور مقامی آبادی، سیاحوں اور مسافروں کو بروقت آگاہی فراہم کرنے کی ہدایات دی گئی ہیں پی ڈی ایم اے نے کاشتکاروں، مال مویشی پال حضرات اور سیاحوں کو خصوصی ہدایات جاری کرتے ہوئے کہا ہے کہ فصلوں اور جانوروں کو محفوظ مقامات پر منتقل کیا جائے اور سیاح خطرناک مقامات پر جانے سے گریز کریں مزید براں متعلقہ اداروں کو ہدایت کی گئی ہے کہ ایمرجنسی سروسز، طبی امداد، خوراک اور دیگر ضروری اشیا کی دستیابی کو یقینی بنایا جائے.