بھارت امریکا سے دو ماہ میں معافی مانگے گا، اعلی امریکی عہدیدار کا دعوی

بھارت نے امریکا کی حمایت نہیں کی تو اس کی برآمدات پر مزید ٹیرف عائد کیے جا سکتے ہیں،انٹرویو

اتوار 7 ستمبر 2025 14:15

واشنگٹن (اُردو پوائنٹ اخبارتازہ ترین - این این آئی۔ 07 ستمبر2025ء)امریکا اور بھارت کے درمیان تجارتی تعلقات ایک بار پھر کشیدگی کا شکار ہوگئے ہیں امریکی کامرس سیکریٹری ہاورڈ لٹ نِک نے دعوی کیا ہے کہ بھارت زیادہ دیر تک واشنگٹن کے دبا ئوکو نظر انداز نہیں کر پائے گا اور چند ہی ماہ میں امریکا کے ساتھ نیا معاہدہ کرنے پر مجبور ہو جائے گا۔ انٹرویو میں ہاورڈ لٹ نِک نے کہا ہے کہ ایک یا دو ماہ میں بھارت مذاکرات کی میز پر آئے گا، معافی مانگے گا اور ڈونلڈ ٹرمپ کے ساتھ ڈیل کرنے کی کوشش کرے گا۔

انہوں نے خبردار کیا کہ اگر بھارت نے امریکا کی حمایت نہیں کی تو اس کی برآمدات پر مزید ٹیرف عائد کیے جا سکتے ہیں۔امریکی سیکریٹری نے طنزیہ انداز میں مزید کہا کہ بھارت محض دکھاوے کے لیے سخت مقف اختیار کر رہا ہے، یہ سب صرف دکھاوا ہے، آخرکار بھارتی کاروباری طبقہ حکومت سے امریکا کے ساتھ ڈیل کا مطالبہ کرے گا۔

(جاری ہے)

ہاورڈ لٹ نِک نے بھارت پر روسی تیل خریدنے اور برکس بلاک کا حصہ بننے پر بھی تنقید کی۔

ان کا کہنا تھا کہ اگر بھارت اپنی منڈی کھولنے کے لیے تیار نہیں، روسی تیل لینا بند نہیں کرتا اور برکس کا حصہ رہتا ہے تو پھر اسے 50 فیصد ٹیرف ادا کرنے ہوں گے، یا پھر بھارت ڈالر اور امریکا کی حمایت کرے، دیکھتے ہیں یہ کھیل کب تک چلتا ہے۔انہوں نے کہا کہ بھارت روسی خام تیل صرف اس لیے خرید رہا ہے کیونکہ وہ پابندیوں کے باعث انتہائی سستا ہے اور نئی دہلی اس سے بھاری منافع کما رہا ہے۔