Live Updates

نااہل حکمرانوں نے کراچی کو کچرا کنڈی بنا دیا ہے، فہیم خان

بارشوں کے بعد کراچی کی صورتحال انتہائی مخدوش ہوگئی ہے، رہنما پی ٹی آئی

جمعرات 18 ستمبر 2025 23:28

کراچی (اُردو پوائنٹ اخبارتازہ ترین - این این آئی۔ 18 ستمبر2025ء)پاکستان تحریک انصاف کراچی کے سینئر نائب صدر و سابق رکن قومی اسمبلی فہیم خان نے انصاف ہاؤس میں میڈیا سے غیر رسمی گفتگو کرتے ہوئے کہا ہے کہ موجودہ حکمرانوں کی کرپشن اور نااہلی نے کراچی کو کچرا کنڈی بنا دیا ہے۔ شہر کی ہر سڑک تباہ حالی کی منظر کشی کر رہی ہے۔انہوں نے کہا کہ بارشوں کے بعد کراچی کی صورتحال انتہائی خراب ہوچکی ہے، سڑکیں جگہ جگہ سے ٹوٹ پھوٹ کا شکار ہیں جبکہ پانی کی لائنیں ٹوٹنے اور واٹر اینڈ سیوریج بورڈ کی کرپشن و نااہلی کی وجہ سے شہری بوند بوند پانی کو ترس رہے ہیں۔

چار روز سے یونیورسٹی روڈ، لیاقت آباد سمیت دیگر علاقوں میں پانی اور سیوریج کی لائنیں ٹوٹی پڑی ہیں لیکن انتظامیہ کہیں نظر نہیں آرہی۔

(جاری ہے)

فہیم خان نے کہا کہ کراچی میں 12 سے 16 گھنٹے کی طویل لوڈشیڈنگ کی جارہی ہے جس نے شہریوں کی زندگی اجیرن بنادی ہے۔ کے الیکٹرک کی نااہلی کی وجہ سے روشنیوں کا شہر رات بھر تاریکی میں ڈوبا رہتا ہے۔ کئی علاقوں میں کئی کئی گھنٹے بجلی غائب رہتی ہے، تاریں ٹوٹنے اور ٹرانسفارمر پھٹنے سے بجلی کا نظام بھی درہم برہم ہوچکا ہے۔

پی ٹی آئی رہنما نے کہا کہ فارم 47 کے حکمران عوام کی فکر سے عاری ہیں۔ پاکستان تحریک انصاف وہ سب سے بڑی جماعت ہے جس کے پاس کراچی کا مینڈیٹ موجود ہے، لیکن ایک سازش کے تحت پی ٹی آئی کے امیدواروں کو ہرایا گیا اور جعلی لوگوں کو اسمبلیوں میں بٹھایا گیا جس کے نتیجے میں کراچی کھنڈر بن چکا ہے۔انہوں نے کہا کہ کراچی کو 3,360 ارب روپے ملنے تھے مگر پیپلز پارٹی اور ایم کیو ایم کی ملی بھگت سے شہر کو محروم کردیا گیا۔

پیپلز پارٹی اور ایم کیو ایم ایک سکے کے دو رخ ہیں اور جعلی مینڈیٹ کے ذریعے اقتدار میں آنے والوں نے شہر کے ساتھ سنگین زیادتیاں کی ہیں۔فہیم خان نے کہا کہ ملک اس وقت نازک دور سے گزر رہا ہے اور حالات دن بہ دن خراب ہوتے جا رہے ہیں۔ عمران خان کی رہائی کے بغیر ملک نہیں چل سکتا۔ فیصلہ سازوں کو ہوش کے ناخن لینے چاہئیں کیونکہ معاشی استحکام کے لیے سیاسی استحکام نہایت ضروری ہے۔