Live Updates

فلاحی اداروں کا سیلاب سے متاثرہ علاقوںمیں اقدامات قابل ستائش ہیں، گورنرپنجاب

ہفتہ 20 ستمبر 2025 16:03

سرگودھا(اُردو پوائنٹ اخبارتازہ ترین - این این آئی۔ 20 ستمبر2025ء)گورنر پنجاب سردار سلیم حیدر خان نے کہاہے کہ فلاحی اداروں کا سیلاب سے متاثرہ علاقوںمیں اقدامات قابل ستائش ہیں،پنجاب کے تمام ادارے اور مشینری سیلاب زدگان کی امداد اور بحالی میںمصروف عمل ہیں،بے نظیر انکم سپورٹ پروگرام کے ذریعے سیلاب متاثرین کو امدادی رقوم پہنچائی جائیں۔ انہوں نے روٹری انٹرنیشنل سرگودھا کے صدر مختار مرزا کی قیادت میں ملاقات کرنے والے وفد سے سیلاب کے دوران امدادی سرگرمیوں کے بارے گفتگو کرتے ہوئے کہا کہ گزشتہ سالوں کی نسبت اس سال ملک بھر میں شدید بارشیں ہوئیں اور بھارت کی جانب سے بھی وسیع پیمانے پر پانی چھوڑ دیا گیا جس سے شدیدسیلابی صورتحال کا سامنا کرنا پڑا۔

انہوں نے کہا کہ ہزاروں کی تعداد میںغریب کسانوں کی فصلیں ، مال مویشی، مکانات اور قیمتی سرمایہ سیلابی ریلوں میں بہہ گیا ۔

(جاری ہے)

انہوں نے کہا کہ پنجاب حکومت نے بروقت اقدامات کر کے کئی انسانی جانی و مالی نقصانات کو ہونے سے بچایا۔ گورنر پنجاب نے کہا کہ پیپلز پارٹی کی جانب سے سیلاب زدہ علاقوں میں راشن ، خشک خوراک، ادوایات اور میڈیکل کیمپ سمیت دیگر ضروریات زندگی کی اشیا فراہم کرنے کا سلسلہ جاری ہے ۔

گورنر پنجاب نے کہا کہ صوبے میں اتنے بڑے پیمانے پر آنے والے سیلاب کو حکومت اکیلے نہیں بلکہ عوام کو بھی مل کر متاثرین کی امداد اور بحالی میں اپنا کردار ادا کرنا ہوگا۔ انہوں نے کہا کہ فلاحی اداروں کو چاہئے کہ وہ سیلاب سے تباہ کاریوں کا جائزہ لیں ۔ انہوں نے کہا کہ فلاحی ادارے ایک جگہ نہیں بلکہ پنجاب کے دیگر متاثرہ علا قوں میں بھی اپنی سرگرمیوں کوبڑھائیں تاکہ ہر متاثرہ افراد تک امداد پہنچ سکے۔ وفد نے گورنر پنجاب کو بتایا کہ روٹری انٹرنیشنل کے نمائندگان پورے پاکستان میں سیلاب متاثرین کی خدمت میں مصروف عمل ہیں۔انہوں نے کہا کہ ہماری کوشش ہے کہ سیلاب سے متاثرہ لوگوں کو ہر ممکن امداد فراہم کی جائے۔