وزیراعظم شہبازشریف نے یواین جنرل اسمبلی میں کشمیریوں کی حقیقی ترجمانی کی،کشمیریوں کے حوصلے مزید بلند ہوئے ہیں،وزیراعظم آزادکشمیرچوہدری انوارالحق

ہفتہ 27 ستمبر 2025 19:29

مظفرآباد (اُردو پوائنٹ اخبارتازہ ترین - اے پی پی۔ 27 ستمبر2025ء) وزیراعظم آزادجموں وکشمیر چوہدری انوارالحق نے اقوام متحدہ جنرل اسمبلی میں مسئلہ کشمیر جاندار انداز میں اجاگر کرنے پر وزیراعظم پاکستان محمدشہبازشریف کو خراج تحسین پیش کیا ہے ۔اپنے خصوصی بیان میں وزیراعظم چوہدری انوارالحق نے کہا کہ وزیراعظم پاکستان نے اپنے خطاب میں کشمیری عوام کی حقیقی ترجمانی کی ہے،وزیراعظم محمدشہبازشریف کے خطاب سے کشمیریوں کے حوصلے بلند ہوئے ،وزیراعظم پاکستان کے خطاب سے تحریک آزادی جموں و کشمیر کو نئی جلا ملی ،شہباز شریف کے خطاب سے شہدا کشمیر کے وارثوں کی امنگیں جاگ گئیں ،اقوام متحدہ کی جنرل اسمبلی سے وزیراعظم پاکستان کا خطاب جامع ،مدلل اور باوقار تھا ۔

انہوں نے کہا کہ وزیراعظم پاکستان نے بین الاقوامی امور پر سیر حاصل تبصرہ کیا ،وزیراعظم پاکستان نے مسلم امہ کو درپیش اہم مسائل پر سیر حاصل گفتگو کی ،وزیراعظم شہبازشریف نے آپریشن بنیان مرصوص میں پاکستان کی شاندار کامیابی کو اجاگر کیا ،شہباز شریف نے فلسطین کے مسئلہ کو شاندار انداز میں اجاگر کیا ،وزیراعظم پاکستان نے فلسطینیوں پر اسرائیلی مظالم کی کھل کر مذمت کی ۔

(جاری ہے)

انہوں نے کہا کہ محمدشہبازشریف نے جموں و کشمیر کے ساتھ پاکستان کی کمٹمنٹ کا اعادہ کیا ،اس کے ساتھ ساتھ انہوں نے فتنہ خوارج پر بھی کھل کر بات کی اور دنیا کو پاکستان میں فتنہ الہندوستان کی تخریبی سرگرمیوں بارے بھی آگاہ کیا ،وزیراعظم پاکستان نے دہشت گردی کے خلاف جنگ میں پاکستان کے کردار کو خوبصورتی سے بیان کیا ۔انہوں نے کہا کہ شہباز شریف کے خطاب سے دنیا پاکستان کی پرامن خارجہ پالیسی سے آگاہ ہوئی ،پاکستان کی سفارتی پذیرائی سے کشمیریوں کے حوصلے بلند ہوئےہیں ،سول اور عسکری ہم آہنگی سے پاکستان سیاسی ،سفارتی اور ترقیاتی کامیابیوں کی جانب گامزن ہے۔