پاک چین دوستی لازوال اور ناقابلِ شکست رشتہ ہے ، وزیراعظم شہباز شریف کی چین کے 76ویں قومی دن کے موقع پر چینی قیادت اور عوام کو مبارکباد

بدھ 1 اکتوبر 2025 13:56

اسلام آباد (اُردو پوائنٹ اخبارتازہ ترین - اے پی پی۔ 01 اکتوبر2025ء) وزیراعظم محمد شہباز شریف نے چین کے عوام کی ترقی ، خوشحالی اور کامیابی کےلئے نیک خواہشات کا اظہار کرتے ہوئے کہا ہے کہ پاکستان کو چین کے ساتھ اپنے برادرانہ تعلقات پر فخر ہے، دونوں ممالک دوستی اور شراکت داری میں نئے سنگِ میل عبور کریں گے۔ بدھ کو وزیراعظم آفس کے میڈیا ونگ کی طرف سے جاری بیان کے مطابق وزیراعظم نے حکومتِ پاکستان اور پاکستانی عوام کی جانب سے عوامی جمہوریہ چین کے 76ویں قومی دن کے موقع پر چین کی قیادت اور برادر عوام کو مبارکباد دیتے ہوئے اس مبارک دن پر چین کے عوام کی ترقی، خوشحالی اور کامیابی کے لیے نیک خواہشات کا اظہار کیا۔

وزیراعظم نے کہا کہ یہ دن نہ صرف چین کے شاندار قومی سفر کی یاد دہانی بلکہ ایک عظیم قوم کی ترقی، استحکام اور عالمی سطح پر امن کے قیام میں چین کے کردار کا بھی اعتراف ہے، صدر شی جن پنگ کی دور اندیش اور مثالی قیادت میں چین نے ترقی و خوشحالی کے ایسے سنگِ میل عبور کیے جو دنیا کے لیے روشن مثال ہیں۔

(جاری ہے)

وزیراعظم نے کہا کہ پاکستان اور چین کی دوستی ایک لازوال اور ناقابلِ شکست رشتہ ہے جو وقت گزرنے کے ساتھ مزید مضبوط ہوا ہے۔

وزیراعظم نے کہا کہ یہ رشتہ باہمی اعتماد، قربانی اور اخلاص پر مبنی اور آنے والی نسلوں کے لیے امن، ترقی اور خوشحالی کی ضمانت ہے۔ انہوں نے اپنے چین کے حالیہ دورے کو انتہائی مفید اور نتیجہ خیز قرار دیتے ہوئے کہا کہ دورہ چین کے دوران شنگھائی تعاون تنظیم کے اجلاس اور بی ٹو بی کانفرنس میں اربوں ڈالر کی سرمایہ کاری کے معاہدوں جیسے تاریخی سنگ میل عبور ہوئے ہیں ۔ انہوں نے کہا کہ چین پاکستان اقتصادی راہداری ہمارا چین کے ساتھ انتہائی اہم مشترکہ معاشی منصوبہ ہے جو دوسرے مرحلے میں داخل ہو چکا ہے۔ انہوں نے چین کے ساتھ پاکستان کے برادرانہ تعلقات پر فخر کا اظہار کرتے ہوئے کہا کہ وہ پر امید ہیں کہ دونوں ممالک دوستی اور شراکت داری کے نئے سنگِ میل عبور کریں گے۔\932