پاکستان کے عوام قطر کی قیادت اور عوام کا دل سے احترام کرتے ہیں،انجینئر امیر مقام

پیر 6 اکتوبر 2025 19:40

دوحہ (اُردو پوائنٹ اخبارتازہ ترین - این این آئی۔ 06 اکتوبر2025ء) وفاقی وزیر برائے امور کشمیر، گلگت بلتستان و سیفران انجینئر امیر مقام نے پاکستان و قطر کے دیرینہ اور برادرانہ تعلقات اور باہمی ترقی کے عزم کا اعادہ کرتے ہوئے کہا ہے کہ پاکستان کے عوام قطر کی قیادت اور عوام کا دل سے احترام کرتے ہیں، ہمارے تعلقات مشترکہ اقدار، ایمان اور باہمی ترقی کے عزم پر مبنی ہیں۔

یہاں جاری بیان کے مطابق وفاقی وزیر انجینئر امیر مقام کے اعزاز میں شاہی خاندان سے تعلق رکھنے والے قطر کے سابق وزیر ماحولیات و موسمیاتی تبدیلی شیخ الفلاح بن ناصر کی جانب سے دوحہ میں ایک عشائیہ دیا گیا۔انجینئر امیر مقام نے میزبانی پر ان کا شکریہ ادا کیا اور پاکستان و قطر کے دیرینہ اور برادرانہ تعلقات کی باہمی ترقی کے عزم کا اعادہ کیا۔

(جاری ہے)

انہوں نے توانائی، انفراسٹرکچر، سیاحت اور افرادی قوت کی ترقی جیسے شعبوں میں تعاون کی بے پناہ صلاحیت کو اجاگر کیا۔انہوں نے کہا کہ پاکستان کے عوام قطر کی قیادت اور عوام کا دل سے احترام کرتے ہیں۔ ہمارے تعلقات مشترکہ اقدار، ایمان اور باہمی ترقی کے عزم پر مبنی ہیں۔قطر کے سابق وزیر نے قطر کی ترقی میں پاکستانی کمیونٹی کے کردار کو سراہا اور خطے میں امن، معاشی تعاون اور انسانی ترقی کو فروغ دینے والی کوششوں کے لیے شاہی خاندان کی مستقل حمایت کا اعادہ کیا۔

انہوں نے قطر میں اسرائیلی حملے کے بعد پاکستان کے فوری سخت ردعمل کی تعریف کی۔انہوں نے بھارت کے ساتھ حالیہ جنگ میں پاکستان کی کامیابی کو بھی سراہا۔انہوں نے وزیر اعظم شہباز شریف اور فیلڈ مارشل عاصم منیر کی عظیم قیادت اور جنگ کے دوران فیصلہ کن جواب دینے پر ان کی تعریف کی۔انہوں نے کہا کہ پاکستان کی جنگ میں فتح نے تمام امت مسلمہ کو سربلند کر دیا۔