کرم میں سکیورٹی فورسز پر دہشتگردوں کا حملہ، 11 اہلکار شہید 2 افسر بھی شامل

حملہ کئی گھنٹوں تک جاری رہا، جوابی کارروائی میں 2 دہشتگرد کمانڈر مارے گئے اور 6 زخمی بھی ہوئے؛ ذرائع

ساجد علی بدھ 8 اکتوبر 2025 11:31

کرم میں سکیورٹی فورسز پر دہشتگردوں کا حملہ، 11 اہلکار شہید 2 افسر بھی ..

کرم ( اُردو پوائنٹ اخبارتازہ ترین۔ 08 اکتوبر2025ء ) صوبہ خیبرپختونخواہ کے علاقہ کرم میں سکیورٹی فورسز پر دہشت گردوں کے حملے میں 11 اہلکار شہید ہوگئے۔ اطلاعات کے مطابق ذرائع کا کہنا ہے کہ عسکریت پسندوں کے حملے میں 11 پاکستانی فوجی شہید ہوگئے، ذرائع نے رائٹرز کو بتایا کہ افغان سرحد کے قریب اسلام پسند عسکریت پسندوں کے حملے میں 9 پاکستانی اہلکار اور 2 افسران شہید ہوئے، شہداء میں ونگ کمانڈر اور میجر بھی شامل ہیں، دہشتگردوں کا یہ حملہ کئی گھنٹوں تک جاری رہا، اس دوران سکیورٹی فورسز کی جوابی کارروائی میں 2 دہشتگرد کمانڈر مارے گئے اور 6 زخمی بھی ہوئے ہیں۔

سینٹر فار ریسرچ اینڈ سیکیورٹی اسٹڈیز (CRSS) کی جانب سے جاری کردہ ایک نئی رپورٹ میں بتایا گیا ہے کہ دہشت گرد حملوں اور فوجی کارروائیوں میں تیزی سے اضافے کے باعث گزشتہ تین ماہ کے دوران پاکستان میں 900 سے زائد جاں بحق ہوئے، مجموعی طور پر تشدد کے 329 واقعات ہوئے جن میں کم از کم 901 افراد جاں بحق اور 599 زخمی ہوئے، جن میں عسکریت پسندوں کے حملوں بھی شامل ہیں جن کے جواب میں پاکستانی فوج کی طرف سے جوابی کارروائیاں بھی کی گئیں۔

(جاری ہے)

رپورٹ سے معلوم ہوا ہے کہ یہ پچھلے تین مہینوں کے مقابلے میں 46 فیصد سے زیادہ کا بڑا اضافہ ظاہر کرتا ہے، اس سال اب تک پاکستان میں 2 ہزار 414 اموات ریکارڈ کی گئی ہیں، گزشتہ سال اس کے مقابلے میں 2 ہزار 546 اموات ہوئی تھیں لیکن 2025ء میں ابھی تین ماہ باقی ہیں، ماہرین نے خدشہ ظاہر کیا ہے کہ رواں سال اس حوالے سے پاکستان کے لیے ایک دہائی کے مہلک ترین سالوں میں سے ایک ثابت ہوسکتا ہے۔