Live Updates

فیلڈ مارشل کا کوئی ذاتی ایجنڈا نہیں، ریٹائر ہو کر گھر جائینگے، صدر یا وزیراعظم ہائوس نہیں ‘ رانا ثنا اللہ

بدھ 8 اکتوبر 2025 17:20

لاہور(اُردو پوائنٹ اخبارتازہ ترین - این این آئی۔ 08 اکتوبر2025ء) وزیر اعظم کے مشیر برائے سیاسی امور سینیٹر رانا ثنا اللہ خان نے کہا ہے کہ فیلڈ مارشل عاصم منیر کا کوئی ذاتی ایجنڈا نہیں، فیلڈ مارشل اپنی مدت پوری کرکے سیدھے گھرجائیں گے، فیلڈ مارشل وزیراعظم ہائوس اور ایوان صدر نہیں جائیں گے، نوازشریف وزیراعظم بننا چاہیں تو انہیں کسی سفارش کی ضرورت نہیں، وزیراعظم شہبازشریف نوازشریف کے قدموں میں وزارت عظمی رکھ دیں گے۔

ایک انٹر ویو میں گفتگو کرتے ہوئے انہوںنے کہاکہ پاکستان پیپلزپارٹی کے ساتھ کوئی مسئلہ نہیں،پیپلزپارٹی اور (ن)لیگ نے اکثر مواقع پر تعاون بھی کیا ہے، پیپلزپارٹی اور (ن)لیگ دشمن سیاسی جماعتیں نہیں،ایک جماعت دشمنی کاجذبہ رکھتی ہے جبکہ ہم نہیں رکھنا چاہتے۔

(جاری ہے)

راناثنااللہ نے کہا کہ بلاول بھٹو کی بات کو ہم غلط یا درست سمجھیں،انہیں اپنی بات کرنے کا حق ہے، بلاول بھٹو نے سیلاب متاثرین سے متعلق بات کی،مریم نواز کو اچھی نہیں لگی، پنجاب کے معاملے پر بات کرنا مریم نواز کا حق ہے، مریم نواز ، عثمان بزدار نہیں ہیں، بات دور تک نہیں جائے گی،سیاستدان بات نہیں کرے گا توکیا کرے گا۔

انہوںنے کہا کہ موجودہ سیاسی قیادت کواپنے سیاسی مسائل ٹیبل پربیٹھ کرحل کرنے چاہئیں، ’’اس‘‘طرف سے کوئی مداخلت نہیں ہوگی۔انہوںنے کہا کہ نوازشریف وزیراعظم بننا چاہیں تو انہیں کسی سفارش کی ضرورت نہیں، وزیراعظم شہبازشریف نوازشریف کے قدموں میں وزارت عظمی رکھ دیں گے، نوازشریف کا الیکشن سے پہلے فیصلہ تھا کہ اتحادی حکومت کو لیڈ نہیں کروں گا۔