سکیورٹی فورسز کی خیبر پختونخوا کے ضلع اورکزئی میں خفیہ اطلاعات پر مبنی کارروائی ، بھارتی حمایت یافتہ 19 خوارج ہلاک ، فائرنگ کے تبادلے میں لیفٹیننٹ کرنل اور میجر سمیت 11 جوان شہید

بدھ 8 اکتوبر 2025 13:44

راولپنڈی (اُردو پوائنٹ اخبارتازہ ترین - اے پی پی۔ 08 اکتوبر2025ء) سکیورٹی فورسز نے خیبر پختونخوا کے ضلع اورکزئی میں خفیہ اطلاعات پر مبنی کارروائی کے دوران بھارتی حمایت یافتہ 19 خوارج کو ہلاک کر دیا تاہم فائرنگ کے تبادلے میں لیفٹیننٹ کرنل اور میجر سمیت 11 جوان شہید ہوگئے۔ بدھ کو پاک فوج کے شعبہ تعلقات عامہ (آئی ایس پی آر ) کے مطابق 7 اور 8 اکتوبر 2025 کی درمیانی شب سکیورٹی فورسز نے ضلع اورکزئی میں بھارتی حمایت یافتہ فتنہ الخوارج کی موجودگی کی اطلاع پر خفیہ اطلاعات کی بنیاد پر آپریشن کیا، آپریشن کے دوران سکیورٹی فورسز کی مؤثر اور بروقت کارروائی سے 19 بھارتی حمایت یافتہ خوارج جہنم واصلِ ہوئے تاہم شدید فائرنگ کے تبادلے میں لیفٹیننٹ کرنل جنید عارف اور ان کے نائب میجر طیب راحت نے جرأت و بہادری سے دشمن کا مقابلہ کرتے ہوئے جامِ شہادت نوش کیا۔

(جاری ہے)

شہادت پانے والے لیفٹیننٹ کرنل جنید عارف راولپنڈی کے رہائشی تھے اور ان کی عمر 39 سال تھی جبکہ ان کے نائب میجر طیب راحت بھی راولپنڈی کے رہائشی اور ان کی عمر 33 سال تھی۔لیفٹیننٹ کرنل اور میجر کے ساتھ مزید 9 جانباز سپاہی بھی وطن پر قربان ہوگئے، ان شہدا میں نائب صوبیدار اعظم گل (خیبر)، نائیک عادل حسین (کرم)، نائیک گل امیر (ٹانک)، لانس نائیک شیر خان (مردان)، لانس نائیک طالش فراز (مانسہرہ)، لانس نائیک ارشاد حسین (کرم)، سپاہی طفیل خان (ملاکنڈ)، سپاہی عاقب علی (صوابی) اور سپاہی محمد زاہد (ٹانک) شامل ہیں۔

سکیورٹی فورسز کی جانب سے علاقے میں کلیئرنس اور سینیٹائزیشن آپریشن جاری ہے تاکہ کسی بھی چھپے ہوئے دہشتگرد کو انجام تک پہنچایا جا سکے۔آئی ایس پی آر کے مطابق پاکستان کی سکیورٹی فورسز ملک سے بھارتی حمایت یافتہ دہشت گردی کو ختم کرنے کے لیے پرعزم ہیں اور ہمارے بہادر جوانوں کی ایسی قربانیاں ہمارے عزم کو مزید مضبوط کرتی ہیں۔\932

Facebook Twitter Google + Share on Whatsapp

متعلقہ عنوان :

مزید قومی خبریں