ممکنہ احتجاج: موٹر وے، جی ٹی روڈ، تعلیمی ادارے بند، موبائل و انٹرنیٹ سروس معطل

اسلام آباد راولپنڈی /لاہور (اُردو پوائنٹ اخبارتازہ ترین - این این آئی۔ 10 اکتوبر2025ء) مذہبی جماعت کے احتجاجی ریلی نکالنے کے اعلان کے بعد راولپنڈی اور اسلام آباد کے داخلی اور خارجی راستوں کو کنٹینرز لگا کر مختلف مقامات سے بند کردیا گیا ہے، لاہور تا اسلام آباد موٹر وے اور جی ٹی روڈ کے راستے جزوی طور پر بند رہے، اسلام آباداورراولپنڈی میں میٹرو اور الیکٹرک بس اور لاہور میں اورنج لائن ٹرین معطل رہی ، موبائل سروس اور تعلیمی ادارے بند رہے ،پنجاب یونیورسٹی کے زیراہتمام ہونے والے لا کے امتحانات ملتوی کر دیے گئے، نئی تاریخ کا اعلان بعد میں کیا جائے گا جبکہ وفاقی دارالحکومت اسلام آباد سمیت ملک کے مختلف شہروں میں سکیورٹی ہائی الرٹ رہی ، فضائی نگرانی کی جاری رہی ،موبائل سروس معطل ہونے کے باعث شہریوں کو عزیز و اقارب سے رابطے میں مشکلات کا سامنا رہا ۔

(جاری ہے)

تفصیلات کے مطابق ایک مذہبی جماعت تحریک لبیک پاکستان کی جانب سے احتجاج کے پیش نظر لاہورسے اسلام آباد موٹروے ہر قسم کی ٹریفک کیلئے بند رہی، اسلام آباد سے لاہور آنیوالی موٹروے بھی ٹریفک کیلئے بند رہی، بابوصابو اورٹھوکرنیاز بیگ سے موٹروے پر انٹری بند رہی جبکہ اسلام آباد میں موٹروے پر آنے والے تمام راستے بند رہے۔میڈیا رپورٹ کے مطابق جی ٹی روڈ کے ذریعے لاہور اور اسلام آباد جانے والے تمام راستوں پر کنٹینر کھڑے کر دیے گئے، مختلف شہروں کے لیے سفر کرنے والے مسافروں کو شدید مشکلات کا سامنا کرنا پڑ ا۔

رپورٹ کے مطابق گجرات میں دریائے چناب کا پل بھی ٹرک اور کنٹینر لگا کر بند کر دیا گیا، جی ٹی روڈ پر لالہ موسیٰ، کھاریاں اور سرائے عالمگیر کے مقامات پر بھی کنٹینرز کھڑے کر دیئے گئے،مریدکے، چناب نگر، گجرات سے جی ٹی روڈ بند ہے، جہلم پل اور چکوال موڑ بھی ٹریفک کیلئے بند رہاادھر لاہور میں اورنج لائن ٹرین سروس بھی عارضی طور پر معطل کر دی گئی۔

دریں اثناء گوجرانوالہ جی ٹی روڈ ہر طرح کی ٹریفک کے لیے بند رہا، سادھوکی،کامونکی ٹال پلازہ اور چن داقلعہ، عزیز چوک، چوک فلائی اوور بھی بند کر دیا گیا، ایکسپریس ہائی وے اور سیالکوٹ کی طرف آنے جانے والے راستے بند کر دیے گئے۔محکمہ داخلہ نے پنجاب بھر میں دس روز کے لیے دفعہ 144 نافذ کر دی ، عوامی مقامات، گلی، محلوں اور کھلے میدان میں 4 یا 4 سے زیادہ افراد کے جمع ہونے پر پابندی عائد کی گئی، نماز، شادی، جنازہ، دفاتر اور عدالتوں پر پابندی کا اطلاق نہیں ہوگا تاہم صوبہ بھرمیں اسلحے کی نمائش پر بھی مکمل پابندی ہوگی۔

وفاقی وزیر داخلہ محسن نقوی کی جانب سے موبائل انٹرنیٹ سروس معطل کرنے کی منظوری دی گئی اور یہ مراسلہ گزشتہ شب پی ٹی اے کو بھیجوایا گیا تھا، پی ٹی اے کو بھیجے جانے والے مراسلے کے مطابق جڑواں شہروں میں موبائل انٹرنیٹ سروس گزشتہ رات 12 بجے سے غیر معینہ مدت کے لیے معطل رہے گی ادھر اسلام آباد ہائیکورٹ بار ایسوسی ایشن نے اعلامیہ جاری کیا کہ اسلام آباد کے تمام داخلی راستے بند کر دیے گئے ہیں،راستوں کی بندش کے باعث وکلاکی عدالت تک رسائی مشکل ہے۔

ہائیکورٹ بار نے ججز سے گزارش کی کہ اگر وکلا مقدمات میں پیش نہ ہو سکیں تو ان کے کیسز میں کوئی ایڈورس آرڈر نہ کیا جائے۔دوسری طرف چھبیس نمبر چونگی سے اسلام آباد روات ٹی چوک سے اسلام آباد اور مری سے فیض آباد کی جانب آنے والے راستوں کو بند کردیا گیا ہے، اسلام آباد ٹریفک پولیس نے ٹریفک ڈائیورشن پلان بھی جاری کیا ہوا ہے۔موٹروے اور نیشنل ہائی وے پولیس کی ہیلپ لائن کے مطابق اسلام آباد سے لاہور تک کے لیے موٹروے اور جی ٹی روڈ ہر قسم کی ٹریفک کے لیے کھلی ہے،جڑواں شہروں کی انتظامیہ نے تعلیمی اداروں میں چھٹی کا اعلان نہیں کیا تاہم مختلف شاہراہوں کی بندش کی وجہ سے طالب علموں کو شدید مشکلات کا سامنا رہا تاہم حفاظتی نقطہ نگاہ سے جڑواں شہروں میں چلنے والی میٹرو سروس کو معطل کردیا گیا ہے جبکہ اسلام آباد کے مختلف روٹس پر چلنے والی الیکٹرک بس بھی سڑکوں پر نظر نہیں آرہی،اسلام آباد ٹریفک پولیس کی جانب سے ایک بیان میں کہا گیا تھا کہ امن و امان کی صورتحال کو مدِنظر رکھتے ہوئے 10 اکتوبر کو اسلام آباد میں ہر قسم کی ہیوی ٹریفک کا داخلہ بند ہوگا۔

بیان میں کہا گیا کہ فیض آباد کے چاروں اطراف سے ٹریفک کے لیے متبادل راستے استعمال کیے جائیں گے۔ راول ڈیم چوک سے بجانب فیض آباد دونوں اطراف سے ٹریفک کے لیے متبادل راستے دیے جائیں گے،بہارہ کہو، مری اور اسلام آباد سے راولپنڈی جانے والے حضرات راول ڈیم چوک سے پارک روڈ، کیپٹن نعیم طفیل چوک (ترامری چوک)، لہتراڑ روڈ کھنہ اور ایکسپریس ہائی وے آنے جانے کے لیے استعمال کریں جبکہ ائیر پورٹ جانے والے براستہ کشمیر چوک، سری نگر ہائی وے استعمال کریں گے۔

گارڈن فلائی اوور سے بجانب فیض آباد دونوں اطراف سے ٹریفک کے لیے ڈائیورشن ہو گی، آئی ایٹ کے رہائشی زیرو پوائنٹ، سری نگر ہائی وے، کلب روڈ، راول ڈیم چوک سے پارک روڈ استعمال کریں گے۔اسلام آباد ٹریفک پولیس کے مطابق کھنہ پل سے بجانب فیض آباد ایکسپریس ہائی وے دونوں اطراف سے ٹریفک کے لیے ڈائیورشن ہوگی، کورال سے اسلام آباد آنے والے کھنہ پل سے لہتراڑ روڈ، کیپٹن نعیم طفیل چوک (ترامری چوک) پارک روڈ اور راول ڈیم چوک استعمال کریں،آئی ٹی پی کے مطابق نائنتھ ایونیو آئی جے پی روڈ سے بجانب فیض آباد دونوں اطراف سے ٹریفک کیلئے ڈائیورشن ہوگی۔

بتایاگیا کہ آئی جے پی روڈ سے براستہ گوہر چوک، گندم گودام چوک سے فقیر ایپی روڈ سے سری نگر ہائی وے استعمال کریں، سی ڈی اے ڈبل روڈ سے آئی ٹین سروس روڈ سے ہوتے ہوئے نائینتھ ایونیو اور سری نگر ہائی وے پر جا سکتے ہیں اور اسی طرح آئی جی پی روڈ سے براستہ نائینتھ ایونیو، سری نگر ہائی وے استعمال کریں گے۔دریں اثناء قانون نافذ کرنے والے اداروں کی جانب سے شہر بھی کی فضائی نگرانی بھی جاری رہی۔