Live Updates

افغان اشتعال انگیزی کے جواب میں پاک فوج کو خراجِ تحسین،پنجاب اسمبلی میں 2قراردادیں جمع

پیر 13 اکتوبر 2025 16:16

لاہور (اُردو پوائنٹ اخبارتازہ ترین - این این آئی۔ 13 اکتوبر2025ء) افغان اشتعال انگیزی کے موثر اور بھرپور جواب پر پاک فوج کو خراجِ تحسین پیش کرنے کی 2قراردادیں پنجاب اسمبلی میں جمع کرادی گئیں۔مسلم لیگ (ن) کی رکن صوبائی اسمبلی حنا پرویز بٹ کی جانب سے جمع کروائی قرار کے متن میں کہا گیا ہے کہ فیلڈ مارشل جنرل عاصم منیر کی بہادر، مدبر اور جرات مند قیادت کو زبردست خراجِ تحسین پیش کرتے ہیں۔

پاک فوج نے مشکل حالات میں جس پیشہ ورانہ مہارت، نظم و ضبط اور عزم کا مظاہرہ کیا ہے، وہ پوری قوم کے لیے باعثِ فخر ہے۔قرار داد کے متن مین وزیراعظم شہباز شریف کے اس واضح عزم کی مکمل تائید کی گئی کہ پاکستان کے دفاع، خودمختاری اور قومی سلامتی پر کسی قسم کا سمجھوتا نہیں کیا جائے گا۔

(جاری ہے)

قرارداد میں وزیراعلی پنجاب مریم نواز شریف کے اس بیان کو بھی سراہا گیا جس میں انہوں نے افغان جارحیت کی سخت مذمت کرتے ہوئے کہا تھا کہ پاکستان کی سرحدیں مقدس امانت ہیں اور ان کی حفاظت ہر شہری کا فرض ہے۔

قرارداد کے متن کے مطابق افغان جارحیت کے جواب نے یہ ثابت کر دیا کہ پاکستان ایک امن پسند ملک ہے مگر یہ ہماری کمزوری نہیں بلکہ طاقت اور استقامت کی علامت ہے۔ اس عزم کا اظہار بھی کیا گیا ہے کہ پوری قوم اپنی بہادر مسلح افواج کے ساتھ سیسہ پلائی دیوار کی طرح متحد کھڑی ہے۔متن کا اختتام پاک فوج زندہ باد، پاکستان پائندہ باد کے نعروں پر کیا گیا ۔

علاوہ ازیں پاک افواج کو خراجِ تحسین پیش کرنے کے لیے استحکام پاکستان پارٹی کے رکن صوبائی اسمبلی شعیب صدیقی نے بھی قرار داد جمع کرادی، جس میں انہوں نے فتن الخوارج کے ممکنہ گٹھ جوڑ کی بے نقابی پر پاک فوج کو داد شجاعت دی ہے۔شعیب صدیقی کی جانب سے جمع کرائی گئی قرارداد میں کہا گیا ہے کہ ملکی دفاع میں کسی قسم کا سمجھوتا نہیں کریں گے۔ فیلڈ مارشل جنرل عاصم منیر کی موثر قیادت قابلِ فخر ہے۔

23جوانوں کی شہادت پر انہیں خراجِ عقیدت پیش کرتے ہیں ۔قرارداد کے مطابق افغانستان کی سرزمین سے وطن عزیز پر حملے کسی طور قبول نہیں۔ سرحدی تحفظ اور مثر قواعد عمل میں لائے جائیں۔ پاک فوج ہر اشتعال انگیزی کا بھرپور جواب دینے کے لیے تیار ہے۔ استحکام پاکستان پارٹی دہشت گردی کے خلاف کارروائیوں کی حمایت کرتی ہے۔ قرارداد میں شہدا کے درجات کی بلندی ا ور زخمیوں کی جلد صحت یابی کی دعا بھی کی گئی ۔ آخر میں کہا گیا ہے کہ اللہ تعالی پاکستان کو ہر سازش سے محفوظ رکھے۔