بیرسٹر خان سیف اللہ خان کی برسی عقیدت و احترام سے منائی گئی

ہفتہ 4 اپریل 2026 22:39

پشاور (اُردو پوائنٹ اخبارتازہ ترین - اے پی پی۔ 04 اپریل2026ء) سیف اللہ برادران کے والد بیرسٹر خان سیف اللہ خان کی 62ویں برسی پشاور اور غزنی خیل میں انتہائی عقیدت، احترام اور سادگی سے منائی گئی۔ پشاور میں برسی میں سابق وفاقی وزیر انور سیف اللہ خان، سابق مشیر ملک ریاض اعوان اور دیگر اہم سیاسی وسماجی شخصیات نے شرکت کی جبکہ سابق تحصیل میئرز ذیشان محمد خان، شفقت اللہ خان اور دیگر عمائدین اور کارکنان نے غزنی خیل کی برسی میں شرکت کی۔

اس موقع پر قرآن خوانی کا خصوصی اہتمام کیا گیا۔

(جاری ہے)

پشاور میں ذوالفقار علی شہید کی مغفرت کےلیے خصوصی دعا بھی کی گئی اور ان کی خدمات کو خراج تحسین پیش کرتے ہوئے انور سیف اللہ خان نے کہا کہ ذوالفقار علی بھٹو نے نہ صرف ملک و قوم کو مستحکم ، مضبوط اور خوشحال بنایا بلکہ ایٹمی طاقت بنانے میں بھی ان کا بنیادی کردار ہے۔ انہوں نے کہا کہ شہید بھٹو ایک عظیم قومی رہنما تھے جنہوں نے پاکستان میں جمہوریت، عوامی حقوق اور خودمختاری کی بنیاد رکھی۔ انہوں نے کہا کہ سیف اللہ خاندان کے شہید ذوالفقار علی بھٹو کے ساتھ بہت گہرے تعلقات تھے اور انہوں نے جس طرح پاکستان کی خدمت کی، سیف اللہ خاندان بھی ان خدمات میں برابر کے شریک ہیں ۔