آزادیِ صحافت دراصل آزادیِ اظہار کی بنیاد اور ایک باشعور، مہذب معاشرے کی تشکیل کا ناگزیر جزو ہے، میر علی حسن زہری

?حب(اُردو پوائنٹ اخبارتازہ ترین - آن لائن۔ 03 مئی2026ء) پاکستان پیپلزپارٹی کے سینئر مرکزی رہنما ، ترجمانِ صدرِ مملکت آصف علی زرداری و سینئر نائب صدر پی پی پی بلوچستان میر علی حسن زہری نے عالمی یوم آزادی صحافت کے موقع پر اپنے پیغام میں کہا ہے کہ آزادیِ صحافت دراصل آزادیِ اظہار کی بنیاد اور ایک باشعور، مہذب معاشرے کی تشکیل کا ناگزیر جزو ہے۔

وہ صحافیوں کے ایک وفد سے بات چیت کر رہے تھے ۔اس موقع پر انہوں نے کہا کہ جب تک قلم آزاد نہیں ہوگا، حق و صداقت کی آواز دبتی رہے گی لہذا صحافت کی آزادی کا ہر قیمت پر تحفظ وقت کی اہم ترین ضرورت ہے۔ میر علی حسن زہری نے اپنے بیان میں کہا کہ پاکستان پیپلزپارٹی نے ہمیشہ جمہوریت، انسانی حقوق اور آزادیِ اظہار کے فروغ کے لیے عملی جدوجہد کی ہے۔

(جاری ہے)

پارٹی کی تاریخ اس امر کی شاہد ہے کہ اس نے ہر دور میں صحافی برادری کے شانہ بشانہ کھڑے ہو کر ان کے حقوق کا دفاع کیا اور ان کی آواز کو تقویت بخشی۔ انہوں نے کہا کہ آج بھی پارٹی قیادت اسی عزم کے ساتھ اس مشن کو آگے بڑھا رہی ہے۔ انہوں نے زور دیا کہ میڈیا ریاست کا چوتھا ستون ہے اور اس ستون کی مضبوطی ایک مستحکم جمہوری نظام کی ضامن ہے۔ ان کا کہنا تھا کہ ذمہ دار اور بااصول صحافت نہ صرف عوامی مسائل کو اجاگر کرتی ہے بلکہ ریاستی اداروں کی اصلاح، شفافیت اور احتساب کے عمل کو بھی موثر بناتی ہے۔

میر علی حسن زہری نے کہا کہ موجودہ دور میں سوشل میڈیا اور ڈیجیٹل پلیٹ فارمز نے اطلاعات کے دائرہ کار کو وسعت دی ہے تاہم اس کے ساتھ ساتھ غلط معلومات اور منفی پروپیگنڈے جیسے چیلنجز بھی سامنے آئے ہیں، جن سے نمٹنے کے لیے صحافتی اصولوں، تحقیق اور پیشہ ورانہ دیانتداری کی پاسداری پہلے سے کہیں زیادہ ناگزیر ہو چکی ہے۔ انہوں نے صحافی برادری کی قربانیوں کو سراہتے ہوئے کہا کہ صحافیوں نے ہر مشکل گھڑی میں حق اور سچ کا علم بلند رکھا جو ان کی جرات، عزم اور پیشہ ورانہ دیانتداری کا منہ بولتا ثبوت ہے۔

انہوں نے ان تمام صحافیوں کو خراجِ تحسین پیش کیا جو اپنی جانوں کو خطرے میں ڈال کر سچ کو منظرِ عام پر لاتے ہیں۔ میر علی حسن زہری نے بلوچستان میں صحافیوں کو درپیش مسائل کا خصوصی ذکر کرتے ہوئے کہا کہ یہاں کے صحافیوں کو دیگر علاقوں کی نسبت زیادہ مشکلات کا سامنا ہے جن کے تدارک کے لیے حکومت اور متعلقہ اداروں کو سنجیدہ اور فوری اقدامات اٹھانے چاہئیں تاکہ صوبے میں ایک آزاد محفوظ اور سازگار صحافتی ماحول کو یقینی بنایا جا سکے۔

انہوں نے نوجوان صحافیوں کو مخاطب کرتے ہوئے کہا کہ وہ اپنے قلم کو مثبت سوچ، تحقیق، توازن اور حقیقت پسندی کے ساتھ بروئے کار لائیں اور معاشرے میں امید، آگہی اور تعمیری فکر کے فروغ میں اپنا کردار ادا کریں۔میر علی حسن زہری نے اس عزم کا اعادہ کیا کہ پاکستان پیپلزپارٹی بلوچستان صحافت کی آزادی، صحافیوں کے تحفظ اور اظہارِ رائے کے بنیادی حق کے لیے اپنی جدوجہد جاری رکھے گی کیونکہ آزاد صحافت ہی ایک مضبوط، شفاف اور ترقی یافتہ پاکستان کی حقیقی ضامن ہے۔