وزیراعظم شہباز شریف کا امریکی صد ر کے آبنائے ہرمز میں ’’پروجیکٹ فریڈم‘‘ کو عارضی طور پر روکنے کے اعلان کا خیر مقدم

بدھ 6 مئی 2026 16:10

اسلام آباد (اُردو پوائنٹ اخبارتازہ ترین - اے پی پی۔ 06 مئی2026ء) وزیراعظم محمد شہباز شریف نے امریکی صدر ڈونلڈ ٹرمپ کی طرف سے آبنائے ہرمز میں ’’پروجیکٹ فریڈم‘‘ کو عارضی طور پر روکنے کے اعلان کا خیر مقدم کرتے ہوئے اس توقع کا اظہار کیا ہے کہ یہ پیش رفت ایک ایسے پائیدار معاہدے کی راہ ہموار کرے گی جو خطے اور اس سے باہر دیرپا امن و استحکام کو یقینی بنائے گا۔

بدھ کو ایکس پر اپنے پیغام میں وزیراعظم محمد شہباز شریف نے کہا کہ وہ صدر ڈونلڈ ٹرمپ کے شکر گزار ہیں کہ انہوں نے جرات مندانہ قیادت کا مظاہرہ کرتے ہوئے آبنائے ہرمز میں ’’پروجیکٹ فریڈم‘‘ کو عارضی طور پر روکنے کے حوالے سے بروقت اعلان کیا۔ وزیراعظم نے کہا کہ صدر ڈونلڈ ٹرمپ کی جانب سے پاکستان اور دیگر برادر ممالک خصوصاً سعودی عرب اور میرے برادر عزیز ولی عہد ووزیراعظم محمد بن سلمان کی درخواست پر مثبت اور فراخدلانہ ردعمل اس نازک وقت میں خطے میں امن، استحکام اور مفاہمت کے فروغ میں بہت معاون ثابت ہوگا۔

(جاری ہے)

وزیراعظم نے کہا کہ پاکستان اس عزم پر قائم ہے کہ وہ تحمل، مذاکرات اور سفارت کاری کے ذریعے تنازعات کے پرامن حل کو فروغ دینے والی تمام کوششوں کی مکمل حمایت جاری رکھے گا، ہم پر امید ہیں کہ موجودہ پیش رفت ایک ایسے پائیدار معاہدے کی راہ ہموار کرے گی جو خطے اور اس سے باہر دیرپا امن و استحکام کو یقینی بنائے گا۔\932