آئی جی سندھ اور آل پاکستان سیکیورٹی ایجنسیز ایسوسی ایشن کے درمیان اہم اجلاس، مشترکہ کمیٹی قائم

جمعہ 8 مئی 2026 18:54

کراچی (اُردو پوائنٹ اخبارتازہ ترین - این این آئی۔ 08 مئی2026ء) آئی جی سندھ جاوید عالم اوڈھو سے آل پاکستان سیکیورٹی ایجنسیز ایسوسی ایشن کے چار رکنی وفد نے سینٹرل پولیس آفس کراچی میں ملاقات کی، جس کی سربراہی ایسوسی ایشن کے چیئرمین میجر ریٹائرڈ منیر احمد نے کی۔ملاقات میں ڈی آئی جیز ہیڈکوارٹرز، ٹریننگ، اے آئی جیز آپریشن اور ایڈمن بھی شریک ہوئے۔

اجلاس کے دوران صوبے میں امن و امان کی مجموعی صورتحال، سیکیورٹی اقدامات، اسلحے کی نمائش، پرائیویٹ سیکیورٹی گارڈز کی تعداد و تعیناتی سمیت مختلف امور پر تفصیلی تبادلہ خیال کیا گیا۔اجلاس میں اسلحے کی نمائش کی حوصلہ شکنی، نجی سیکیورٹی گارڈز کی مثر تربیت اور ان کی پیشہ ورانہ کارکردگی مزید بہتر بنانے پر زور دیا گیا۔

(جاری ہے)

فریقین نے اس امر پر اتفاق کیا کہ انفرادی سیکیورٹی اور حساس مقامات کے تحفظ میں پرائیویٹ سیکیورٹی گارڈز اہم کردار ادا کررہے ہیں۔

اس موقع پر سندھ پولیس اور سیکیورٹی ایجنسیز کے مابین باقاعدہ کمیٹی تشکیل دینے کا اعلان بھی کیا گیا، جس کا مقصد باہمی روابط کو فروغ دینا اور مشترکہ سیکیورٹی حکمت عملی کو مزید موثر اور قابل عمل بنانا ہے۔ایسوسی ایشن کے صدر میجر ریٹائرڈ منیر احمد نے وفد کو بریفنگ دیتے ہوئے کہا کہ سیکیورٹی ایجنسیز میں بھرتی سے قبل امیدواروں کے کوائف کی مکمل تصدیق اور اسکروٹنی کی جاتی ہے جبکہ کریمنل ریکارڈ رکھنے والے افراد کو ہرگز بھرتی نہیں کیا جاتا۔

انہوں نے کہا کہ سندھ پولیس اور نجی سیکیورٹی اداروں کے درمیان غیر معمولی روابط قائم ہیں۔آئی جی سندھ جاوید عالم اوڈھو نے کہا کہ عوام میں انفرادی سیکیورٹی کے حصول سے متعلق آگاہی بڑھانے کی ضرورت ہے۔ انہوں نے زور دیا کہ نجی سیکیورٹی ادارے اپنے گارڈز کی ویری فکیشن، تربیت اور ڈسپلن پر خصوصی توجہ دیں تاکہ شہریوں کا اعتماد برقرار رہے۔انہوں نے مزید کہا کہ پولیس اور نجی سیکیورٹی اداروں کے درمیان مثر رابطہ اور معلومات کے تبادلے سے جرائم کی روک تھام میں نمایاں مدد مل سکتی ہے، جبکہ سیکیورٹی ایجنسیز کو اپنے تربیتی ادارے اور ٹریننگ سینٹرز بھی قائم کرنے چاہئیں۔