نمل میں معرکۂ حق کی پہلی سالگرہ ملی جوش و جذبے سے منائی گئی

اسلام آباد (اُردو پوائنٹ اخبارتازہ ترین - اے پی پی۔ 08 مئی2026ء) نیشنل یونیورسٹی آف ماڈرن لینگویجز اسلام آباد میں معرکۂ حق اور آپریشن بنیانٌ مرصوص کی کامیابی کو خراج تحسین پیش کرنے کے لیے ایک پروقار سیمینار کا انعقاد کیا گیا جس میں قومی جذبے اور حب الوطنی کا بھرپور مظاہرہ کیا گیا۔ سابق سفیر اور سابق صدر آزاد جموں و کشمیر سردار مسعود خان اور معروف صحافی و اینکر پرسن انیقہ نثار نے مہمان خصوصی کی حیثیت سے شرکت کی۔

تقریب میں ریکٹر نمل میجر جنرل (ر) شاہد محمود کیانی، ہلال امتیاز (ملٹری)، ڈائریکٹر جنرل نمل بریگیڈیئر محمد رفیق خان، مختلف شعبہ جات کے ڈینز، ڈائریکٹرز، فیکلٹی ممبران اور طلبہ کی بڑی تعداد نے شرکت کی۔ ڈین فیکلٹی آف سوشل سائنسز ڈاکٹر ریاض شاد نے اپنی استقبالیہ خطاب پیش کرتے ہوئے قومی سنگ میلوں کی یاد منانے کی اہمیت پر روشنی ڈالی اور کہا کہ ایسی تقریبات نوجوانوں میں اتحاد اور حب الوطنی کے جذبات کو فروغ دیتی ہیں۔

(جاری ہے)

اپنے خطاب میں انیقہ نثار نے معرکۂ حق کی اہمیت پر زور دیتے ہوئے کہا کہ بھارت کی پاکستان کو عالمی سطح پر تنہا کرنے کی تمام کوششیں ناکام ہو چکی ہیں اور پاکستان ایک ذمہ دار اور مستحکم عالمی قوت کے طور پر ابھرا ہے۔ انہوں نے جدید جنگوں میں بیانیے کی اہمیت پر بات کرتے ہوئے کہا کہ غلط معلومات اور پروپیگنڈے کا مؤثر جواب دینا وقت کی اہم ضرورت ہے۔

پہلگام واقعے کا حوالہ دیتے ہوئے انہوں نے کہا کہ بھارت کے بیانیے میں موجود تضادات اور خامیوں کو بے نقاب کرنے کے باعث اسے عالمی سطح پر پذیرائی حاصل نہ ہو سکی۔ انہوں نے مزید کہا کہ بھارت کی یہ کوشش کبھی کامیاب نہیں ہو سکتی کہ وہ خود کو پرامن ریاست جبکہ پاکستان کو دہشت گرد ملک ثابت کرے۔ انہوں نے معرکۂ حق کے دوران پاکستانی نوجوانوں کے کردار کو سراہتے ہوئے کہا کہ نوجوانوں نے ڈیجیٹل اور سوشل میڈیا پلیٹ فارمز پر جھوٹے بیانیوں کا بھرپور مقابلہ کیا۔

ان کا کہنا تھا اب وقت آ گیا ہے کہ پاکستان مزید بلندیوں کی جانب بڑھے، کسی کو بھی اس قوم کو کمزور نہیں سمجھنا چاہیے۔ سابق سفیر مسعود خان نے وطن کے شہداء کو زبردست خراجِ عقیدت پیش کیا اور آپریشن بنیانٌ مرصوص کو پاکستان کی تاریخ کا ایک اہم موڑ قرار دیا۔ انہوں نے کہا کہ بھارت کی عددی برتری کے باوجود پاکستان نے سفارتی اور عسکری میدان میں غیر معمولی صلاحیتوں کا مظاہرہ کیا۔

انہوں نے اس بات کا اعادہ کیا کہ پاکستان ایک امن پسند ملک ہے اور خطے میں امن و استحکام کا خواہاں ہے۔ انہوں نے معرکۂ حق کو قومی اتحاد کی علامت قرار دیتے ہوئے طلبہ پر زور دیا کہ وہ اس موضوع پر تحقیق کریں تاکہ اس کی تاریخی اور تزویراتی اہمیت کو بہتر انداز میں سمجھ سکیں۔ مسعود خان نے بین الاقوامی تنازعات میں پاکستان کے مصالحتی کردار، خصوصاً امریکہ اور ایران کے حوالے سے کوششوں کو سراہتے ہوئے کہا کہ پاکستان نے خود کو عالمی سطح پر ایک ذمہ دار اور بااثر ملک کے طور پر منوایا ہے۔

نوجوانوں سے خطاب کرتے ہوئے انہوں نے انہیں یکجہتی، توجہ اور قومی ترقی کے لیے پرعزم رہنے کی تلقین کی۔ انہوں نے جدید مہارتیں حاصل کرنے اور موجودہ دور کی جنگوں میں سوشل میڈیا اور ٹیکنالوجی کے کردار کو سمجھنے کی اہمیت پر بھی زور دیا اور طلبہ کو خود کو بہتر بنانے اور پاکستان کو مضبوط اور خوشحال بنانے میں مثبت کردار ادا کرنے کی ہدایت کی۔

اپنے اختتامی کلمات میں ریکٹر نمل میجر جنرل (ر) شاہد محمود کیانی، ہلال امتیاز (ملٹری)، نے کہا کہ قومیت اور حب الوطنی کو فروغ دینے والے سیمینار نوجوان نسل میں اتحاد کے جذبے کو مضبوط بنانے میں اہم کردار ادا کرتے ہیں۔ انہوں نے معرکۂ حق کو اللہ تعالیٰ کی ایک عظیم نعمت قرار دیتے ہوئے کہا کہ پاکستان کو غیر مستحکم کرنے کی دشمنوں کی تمام سازشیں ناکام ہوئی ہیں اور آئندہ بھی ناکام رہیں گی۔ انہوں نے کہا کہ پاکستان نے دنیا کو اپنی قوم کی طاقت اور استقامت کا عملی مظاہرہ دکھایا ہے اور اتحاد ہی ہماری سب سے بڑی قوت ہے۔ طلبہ کو مخاطب کرتے ہوئے انہوں نے نصیحت کی کہ وہ قرآن و سنت کی تعلیمات کو مضبوطی سے تھامے رکھیں اور اپنے ایمان و اقدار پر ثابت قدم رہیں۔