گرین لائن منصوبہ کراچی کے شہریوں کے لیے محمد نواز شریف کا اہم تحفہ ہے، گورنر سندھ

جمعہ 8 مئی 2026 23:56

کراچی (اُردو پوائنٹ اخبارتازہ ترین - این این آئی۔ 08 مئی2026ء) گورنر سندھ سید محمد نہال ہاشمی سے پاکستان انفراسٹرکچر ڈیولپمنٹ کمپنی لمیٹڈ (پی آئی ڈی سی ایل) کے چیئرمین وسیم اختر باجوہ نے گورنر ہاؤس میں ملاقات کی۔ ملاقات میں کراچی اور حیدرآباد میں جاری ترقیاتی منصوبوں، بالخصوص گرین لائن بی آر ٹی منصوبے پر تفصیلی بریفنگ دی گئی۔گورنر سندھ نے کہا کہ گرین لائن منصوبہ محمد نواز شریف کی جانب سے کراچی کے شہریوں کے لیے ایک اہم اور دیرپا تحفہ ہے، جس سے شہریوں کو جدید، محفوظ اور معیاری سفری سہولیات میسر آئیں گی۔

انہوں نے کہا کہ وزیراعظم محمد شہباز شریف نے کراچی اور حیدرآباد کی ترقی کے لیے بالترتیب 1500 اور 500 ملین روپے کے خصوصی پیکجز کی منظوری دی ہے۔ملاقات میں آگاہ کیا گیا کہ وفاقی فنڈنگ کے تحت کراچی میں 504 جبکہ حیدرآباد میں 17 ترقیاتی منصوبوں کی تکمیل کا منصوبہ بنایا گیا ہے۔

(جاری ہے)

چیئرمین پی آئی ڈی سی ایل نے بتایا کہ گرین لائن منصوبے کے فیز ٹو کو رواں سال کے اختتام تک مکمل کرنے کا ہدف مقرر کیا گیا ہے۔

وسیم اختر باجوہ نے گورنر سندھ کو این او سیز، یوٹیلیٹی شفٹنگ اور دیگر انتظامی رکاوٹوں سے بھی آگاہ کیا۔ اس موقع پر گورنر سندھ نے ترقیاتی منصوبوں میں حائل تمام رکاوٹیں فوری طور پر دور کرنے کی واضح ہدایت دیتے ہوئے این او سیز اور دیگر منظوریوں کے لیے ون ونڈو آپریشن کے فوری قیام پر زور دیا۔گورنر سندھ سید محمد نہال ہاشمی نے اعلان کیا کہ وہ گرین لائن منصوبے کا ہر 15 روز بعد جائزہ لیں گے تاکہ منصوبے کی بروقت تکمیل کو یقینی بنایا جا سکے۔ انہوں نے کہا کہ شہری انفراسٹرکچر کی بہتری سے نہ صرف ٹریفک کے مسائل میں کمی آئے گی بلکہ معاشی سرگرمیوں میں بھی اضافہ ہوگا۔