Live Updates

پاکستان کی ثالثی کا عمل ناکام نہیں ہوا، اِس وقت مشکلات کا شکار ہے، ایرانی وزیر خارجہ

افزودہ یورینیم کے معاملے پر ڈیڈ لاک پیدا ہوچکا، ہم امریکیوں پر بالکل بھروسہ نہیں کرسکتے، اسی وجہ سے کسی بھی معاہدے سے پہلے ہر چیز واضح ہونی چاہیئے؛ نئی دہلی میں پریس کانفرنس سے خطاب

ساجد علی جمعہ 15 مئی 2026 15:34

پاکستان کی ثالثی کا عمل ناکام نہیں ہوا، اِس وقت مشکلات کا شکار ہے، ایرانی ..

نئی دہلی (اُردو پوائنٹ اخبارتازہ ترین۔ 15 مئی2026ء) ایران کے وزیر خارجہ عباس عراقچی کا کہنا ہے کہ پاکستان کی ثالثی کا عمل ناکام نہیں ہوا، لیکن اِس وقت مشکلات کا شکار ہے۔ برکس وزرائے خارجہ کے اجلاس کے موقع پر بھارتی دارالحکومت نئی دہلی میں پریس کانفرنس کرتے ہوئے ایران کے وزیر خارجہ عباس عراقچی نے امریکہ کے ساتھ جاری مذاکرات اور جوہری پروگرام کے حوالے سے اہم انکشافات کیے۔

ان کا کہنا ہے کہ دونوں ممالک کے درمیان افزودہ یورینیم کے معاملے پر ڈیڈ لاک پیدا ہو چکا ہے، تہران اور واشنگٹن کے درمیان افزودہ جوہری مواد کو سنبھالنے کے معاملے پر مذاکرات عملی طور پر بند گلی میں داخل ہو گئے ہیں، اس پیچیدہ موضوع پر فی الحال مزید بات چیت ممکن نہیں رہی، اس لیے اسے مذاکرات کے آخری مراحل تک کے لیے مؤخر کر دیا گیا ہے۔

(جاری ہے)

عباس عراقچی کہتے ہیں کہ فی الوقت یہ موضوع نہ تو زیرِ بحث ہے اور نہ ہی اس پر کوئی گفت و شنید ہو رہی ہے، ہم مذاکرات کے اگلے مراحل میں اس پر واپس آئیں گے، امریکہ کے ساتھ مذاکرات میں سب سے بڑی رکاوٹ اعتماد کا فقدان ہے، ایران صرف اسی صورت میں امریکہ کے ساتھ بات چیت آگے بڑھانے میں دلچسپی رکھتا ہے اگر دوسری طرف سے سنجیدگی کا مظاہرہ کیا جائے۔

ایرانی وزیر خارجہ نے کہا کہ ہمیں امریکی نیتوں پر شک ہے اور ان پر بالکل بھروسہ نہیں، جو کہ مذاکرات کو سب سے زیادہ نقصان پہنچا رہا ہے، جس لمحے ہمیں یہ محسوس ہوا کہ امریکہ ایک منصفانہ اور متوازن معاہدے کے لیے تیار ہے، ہم فوری طور پر مذاکراتی عمل کو آگے بڑھائیں گے، ایران جنگ بندی کو برقرار رکھنے کی کوشش کر رہا ہے تاکہ سفارتکاری کو ایک موقع دیا جا سکے، تاہم امریکہ کی جانب سے غیر سنجیدہ رویہ اور بد اعتمادی ان کوششوں کو سبوتاژ کر رہی ہے۔