ضلع وہاڑی کی گولڈن جوبلی تقریبات کا آغاز، ڈسٹرکٹ بار میں سیمینار؛ قانون کی حکمرانی اور جوابدہی پر زور

بدھ 1 جولائی 2026 18:34

وہاڑی (اُردو پوائنٹ اخبارتازہ ترین - اے پی پی۔ 01 جولائی2026ء) ضلع وہاڑی کی گولڈن جوبلی تقریبات کا باقاعدہ آغاز ڈسٹرکٹ بار وہاڑی میں منعقدہ ایک پروقار سیمینار سے کیا گیا، جس میں سپیکر پنجاب اسمبلی ملک محمد احمد خان، صوبائی وزیر قانون رانا محمد اقبال، سینئر قانون دان اعتزاز احسن، کمشنر ملتان رانا عامر کریم، وائس چیئرمین پاکستان بار کونسل پیر مسعود چشتی، وائس چیئرمین پنجاب بار کونسل خواجہ قیصر بٹ، اراکین اسمبلی، وکلا اور مختلف شعبہ ہائے زندگی سے تعلق رکھنے والی شخصیات نے شرکت کی۔

تقریب میں ضلع وہاڑی کی گولڈن جوبلی کا یادگاری کیک بھی کاٹا گیا۔سیمینار سے خطاب کرتے ہوئے سپیکر پنجاب اسمبلی ملک محمد احمد خان نے کہا کہ حقیقی ترقی صرف عمارتوں، ہسپتالوں اور سکولوں کی تعمیر سے نہیں بلکہ قانون کی حکمرانی، اداروں کے احترام اور مؤثر جوابدہی سے ممکن ہے۔

(جاری ہے)

انہوں نے کہا کہ عوامی نمائندے خود بھی عوام کے سامنے جوابدہ ہیں اور شہریوں کو بنیادی سہولیات کی فراہمی حکومت کی ذمہ داری ہے، احسان نہیں۔

سینئر قانون دان اعتزاز احسن نے کہا کہ ضلع وہاڑی کے قیام کا مقصد اختیارات کو نچلی سطح تک منتقل کرنا تھا اور وہ خود اس وقت پلاننگ اینڈ ڈویلپمنٹ کے وزیر کی حیثیت سے اس عمل کا حصہ تھے۔ انہوں نے ملکی و بین الاقوامی امور پر اظہار خیال کرتے ہوئے کہا کہ وزیراعظم شہباز شریف نے حالیہ کشیدہ صورتحال میں جنگ کو روکنے میں اہم کردار ادا کیا، جس پر وہ انہیں خراج تحسین پیش کرتے ہیں۔

انہوں نے زرعی اراضی کے تحفظ اور شوگر ملز کے اثرات پر بھی تشویش کا اظہار کیا۔کمشنر ملتان رانا عامر کریم نے کہا کہ وہاڑی ان کا اپنا ضلع ہے اور گولڈن جوبلی تقریبات میں شرکت ان کے لیے باعث افتخار ہے۔ انہوں نے وکلا کے دیرینہ مطالبات کے حل میں ہر ممکن تعاون کی یقین دہانی کراتے ہوئے کہا کہ گزشتہ پچاس برسوں کی کامیابیوں اور محرومیوں کا جائزہ لے کر مستقبل کی منصوبہ بندی کرنا وقت کی ضرورت ہے۔