مسلم لیگ (ن) کے زیر اہتمام انتخابی مہم کے سلسلے میں باغ میں بڑا عوامی جلسہ

باغ (اُردو پوائنٹ اخبارتازہ ترین - اے پی پی۔ 08 اگست2026ء) مسلم لیگ (ن) کے زیر اہتمام انتخابی مہم کے سلسلے میں باغ میں بڑا عوامی جلسہ منعقد ہوا جس میں ہزاروں کارکنوں اور شہریوں نے شرکت کی۔ جلسے سے وزیراعظم کے مشیر رانا ثناء اللہ اور وفاقی وزیر انجینئر امیر مقام نے خطاب کیاجبکہ مسلم لیگ (ن) آزاد کشمیر کے صدر شاہ غلام قادر، پارٹی امیدوار مشتاق منہاس، سردار میر اکبر، نومنتخب ارکان اسمبلی اور دیگر رہنماؤں نے بھی شرکت کی۔

وفاقی رہنماؤں کی باغ آمد پر مسلم لیگ (ن) کے کارکنوں نے پرتپاک استقبال کیا اور پارٹی کے حق میں نعرے بازی کی۔جلسے سے خطاب کرتے ہوئے وفاقی وزیر انجینئر امیر مقام نے کہا کہ آج باغ میں مسلم لیگ (ن) نے اپنی بھرپور سیاسی طاقت کا مظاہرہ کیا ہے۔ انہوں نے کہا کہ پیپلز پارٹی کے رہنما بھی باغ آکر دیکھیں کہ یہاں کے عوام کس کے ساتھ ہیں۔

(جاری ہے)

بلاول بھٹو زرداری بھی باغ میں جلسہ کر رہے ہیں، اب عوام خود فیصلہ کریں گے کہ کس جلسے میں زیادہ لوگ شریک ہوئے۔

انجینئر امیر مقام نے پیپلز پارٹی کی جانب سے انتخابی دھاندلی کے الزامات پر ردعمل دیتے ہوئے کہا کہ محض الزامات لگانے سے کچھ حاصل نہیں ہوتا، پیپلز پارٹی کو عوامی فیصلے کا جائزہ لینا چاہیے۔ انہوں نے کہا کہ آزاد کشمیر میں حکومت، وزیراعظم، پولیس اور انتظامیہ پیپلز پارٹی کے پاس تھی، اس کے باوجود انتخابات میں دھاندلی کے الزامات سمجھ سے بالاتر ہیں۔

انہوں نے کہا کہ پیپلز پارٹی کو سوچنا چاہیے کہ عوام نے اسے کیوں مسترد کیا، پیپلز پارٹی کو آزاد کشمیر کے بجائے سندھ کے عوام کے مسائل حل کرنے پر توجہ دینی چاہیے۔انجینئر امیر مقام نے کہا کہ آزاد کشمیر کے عوام نے مسلم لیگ (ن) کی ترقیاتی پالیسیوں اور نواز شریف، شہباز شریف اور مریم نواز کی عوامی خدمت پر اعتماد کا اظہار کیا ہے۔ گلگت بلتستان میں بھی مسلم لیگ (ن) حکومت بنانے کی پوزیشن میں تھی تاہم مسلم لیگ (ن) نے جمہوری روایات کے تحت پیپلز پارٹی کو حکومت بنانے کا موقع دیا۔

انہوں نے کہا کہ مسلم لیگ (ن) کسی کا حق نہیں چھینتی، تاہم اپنے حقوق پر ڈاکہ بھی نہیں ڈالنے دے گی۔ حکومت اپنی پانچ سالہ آئینی مدت مکمل کرے گی۔ 2016 میں بھی عوام نے مسلم لیگ (ن) کو ووٹ دیا تھا۔وفاقی وزیر نے کہا کہ احتجاج کے بجائے مسائل کا حل بات چیت کے ذریعے نکالا جا سکتا ہے۔ انہوں نے عوام سے اپیل کی کہ 10 اگست کو شیر کے انتخابی نشان پر مہر لگا کر مسلم لیگ (ن) کے امیدواروں کو کامیاب بنائیں۔

انجینئر امیر مقام نے دعویٰ کیا کہ مسلم لیگ (ن) آزاد کشمیر میں واضح اکثریت حاصل کر چکی ہے اور باغ کی تمام نشستوں پر بھی مسلم لیگ (ن) کامیاب ہوگی۔مرکز میں مسلم لیگ (ن) کی حکومت ہے اور آزاد کشمیر میں بھی مسلم لیگ (ن) حکومت بنائے گی۔ انہوں نے کہا کہ باغ اور حویلی کے عوام سے کیے گئے تمام وعدے پورے کیے جائیں گے۔انہوں نے کہا کہ کشمیر کے عوام نے ثابت کیا ہے کہ وہ جمہوریت پر یقین رکھتے ہیں۔

باغ شہدا اور غازیوں کی سرزمین ہے، یہاں آکر دلی خوشی محسوس ہو رہی ہے۔وزیراعظم کے مشیر رانا ثناء اللہ نے جلسے سے خطاب کرتے ہوئے کہا کہ پاکستان اور کشمیر کا رشتہ لازوال ہے۔ جب کشمیری کہتے ہیں کہ ’’ہم پاکستانی ہیں اور پاکستان ہمارا ہے‘‘ تو 25 کروڑ پاکستانیوں کے دل ان کے ساتھ دھڑکتے ہیں۔انہوں نے کہا کہ کشمیری صرف پاکستانی نہیں بلکہ پاکستان کے مالک بھی ہیں۔

پاکستان کی مسلح افواج میں کشمیریوں کی نمایاں نمائندگی موجود ہے۔تحریک آزادی کشمیر دراصل پاکستان کی تکمیل کی جدوجہد ہےجبکہ کشمیر پاکستان کی شہ رگ ہے اور یہ عقیدہ ہر پاکستانی کے ایمان کا حصہ ہے۔رانا ثناء اللہ نے کہا کہ بھارت پاکستانیوں اور کشمیریوں کے درمیان غلط فہمیاں پیدا کرنے کی سازش کر رہا ہے، تاہم بھارت کے عزائم کبھی کامیاب نہیں ہوں گے۔

پاکستان کشمیر ہے اور کشمیر پاکستان ہے۔انہوں نے کہا کہ دو روز بعد باغ سے مزید شیر کامیاب ہو کراسمبلی پہنچیں گے۔ مسلم لیگ (ن) آزاد کشمیر میں دو تہائی اکثریت سے حکومت بنائے گی۔ عوام کا مسلم لیگ (ن) پر اعتماد دراصل نواز شریف، شہباز شریف اور مریم نواز کی قیادت اور عوامی خدمت کا اعتراف ہے۔وزیراعظم کے مشیر نے کہا کہ پنجاب میں ہمت کارڈ، بلاسود قرضوں اور جدید ٹرانسپورٹ جیسے منصوبے جاری ہیں۔

مسلم لیگ (ن) عوامی خدمت کے پنجاب ماڈل کو آزاد کشمیر میں بھی آگے بڑھائے گی۔رانا ثناء اللہ نے پیپلز پارٹی کے چیئرمین بلاول بھٹو زرداری کو تنقید کا نشانہ بناتے ہوئے کہا کہ بلاول بھٹو زرداری خالی کرسیوں سے خطاب کرکے دھاندلی کا شور مچا رہے ہیں، جبکہ حقیقت یہ ہے کہ عوام نے مسلم لیگ (ن) پر اعتماد کا اظہار کیا ہے۔انہوں نے کہا کہ مسلم لیگ (ن) دو تہائی اکثریت سے حکومت بنانے کے بعد تمام منتخب نمائندوں سے مشاورت کرے گی۔

عوامی مسائل کا حل مسلم لیگ (ن) کی حکومت کی اولین ترجیح ہوگا۔جلسے میں مسلم لیگ (ن) آزاد کشمیر کے صدر شاہ غلام قادر، نومنتخب ارکان اسمبلی سردار انجینئر عمیر نعیم ایڈووکیٹ، شعیب عابد، راجہ افتخار اور سردار طارق محمود سمیت دیگر پارٹی رہنماؤں نے شرکت کی۔باغ میں ہزاروں کارکنوں کی شرکت نے مسلم لیگ (ن) کی قیادت سے بھرپور وابستگی کا اظہار کیا، جبکہ جلسے کے دوران پارٹی کے حق میں مسلسل نعرے بازی بھی کی جاتی رہی۔